CI-HWPL Asina MoU ho Organizasaun Mídia Lima.

Conselho de Imprensa de Timor-Leste (CI), hamutuk ho Parseiru Internasional Heavenly Culture World Peace Restoration Light (HWPL), Asina Nota Entendimentu ho Organizasaun Mídia lima hanesan Rádiu Liberdade Dili, Rádiu Komunidade Comoro, SapNewsTL, Mídia Labeh no Hatutan.com.

Objetivu husi Nota Entendimentu ne’e atu sai hanesan pasu signifikativu hodi transforma Dili sai sidade dame nian. Objetivu seluk mak atu promove kultura dame liu husi habelar konsiénsia no forma opiniaun públiku no kompriensaun ida kle’an kona-ba pás nian.

Prezidente Konsellu imprensa Otélio Ote hatete, dehan tuir lolos Asina Nota Entendimentu ne’e ba mídia hotu, maibe iha mídia lima de’it konkorda atu asina nota entendementu ne’e.

“ami fo tiha ona naran media no kontaktu sira atu komunika ho media sira, maibe realiade iha media lima mak konsege komunika ho susesu to ohin loron realiza asina akordu ne’e, ha’u la hatene tanba sira la asesu ba email, ka la responde ba email husi HWPL” tenik Prezidente.

Prezidente dehan Konsellu Imprensa hanesan sumbriña ba mídia sira iha Timor-Leste, no asegura katak iha asesu informasaun ba sidadaun hotu iha liberdade imprensa.

Fatin hanesa Sekretária Estadu Komunikasaun Sosiál, Expedito Dias Ximenes agradese ba Conselho Imprensa no mídia lima ne’ebé asina ona nota entendementu ne’e, atu oinsá mídia no jornalista sira hakerek públika informasaun tau atensaun ba pás.

“hanesan ha’u hatete katak laiha pás laiha dezenvolvimentu, nomos laiha dezenvolvimentu laiha pás, tanba ne’e mak pás no dezenvolvimentu ne’e buat rua tenki la’o hamutuk” dehan SEKOMS Expedito Dias Ximenes.

HWPL maka organizasaun naun-governamentál ida ne’ebé estabelese iha loron 25 fulan-maiu tinan 2023 , no rejistadu iha Governu Metropolitanu Seul Repúblika Koreia nian. Nia asosiadu ho Departamentu ONU nian ba Komunikasaun Globál (DGC) no iha Estatutu Konsultivu Espesiál ho Konsellu Ekonómiku no Sosiál ONU nian (ECOSOC). Hodi tuir espíritu Deklarasaun Dame Mundiál nian. HWPL hala’o hela atividade dame nian iha mundu tomak hodi hakarak atu hetan dame mundiál liuhosi kultura lalehan nian no restaura komunidade globál ho naroman.

Expedito haktuir jornalista no meius komunikasaun sosiál sira iha nia papél importante tebes tanba Timor-Leste nasaun post konflitu, nasaun foun presiza kria pás, estabilidade atu dezenvolvimetu bele la’o ho di’ak.

Jornalista: Natalino Ximenes & Natalia Araújo.