Grupu Juventude Kreativu Moris Di’ak (JKMD), iha Suku Ritabou, Postu Administrativu Maliana, Munisípiu Bobonaro, halo atividade hakiak ikan ho inisiativa rasik hodi sustenta sira nia moris no kria atividade ekonomia.
Kordenador JKMD, Januario Soares Tavares, hatete katak grupu ne’e harii iha tinan 2020, kompostu husi joven na’in 9, ne’ebé inklui feto na’in 2 no mane na’in 7. Sira hahú atividade ne’e ho inisiativa rasik no uza osan rásik hodi harii no hala’o atividade grupu. Hafoin, grupu ne’e hetan tan apoiu finanseiru husi Oitavu Governu.
“Ami ho inisiativa rásik hodi hari grupu ne’e, ami nain sia tau osan hamutuk iha inísiu ami hakiak ikan iha kolam rua agora senti sufisiente ona, hahu koileta no faan ba komunidadesira inklui fornese ba merenda eskolar iha munisípiu Bobonaro,”dehan Koordenador grupu .
Nia mós hatete katak durante atividade ne’e, sira enfrenta difikuldade atu hetan hahan ba ikan no ikan-oan. Kolam ne’ebé sira uza mós besik mota, ne’ebé bele sai risku bainhira tempu udan no mota boot.
“Difikuldade ne’ebé ami hasoru mak kona-ba stock hahan ba ikan, no bainhira udan mota boot tun ne’ebé bele fó risku ba ikan sira,” hatete Januario.
Ba oin, JKMD planu atu hadi’a lutu iha kolam hodi prevene animal tama no aumenta tan fatin hakiak ikan.
Diretór Ezekutivu Centro Juventude Bobonaro, Alsino Lopes, hatete katak iha tinan 2022, Centro Juventude servisu hamutuk ho Sekretaria Estadu Juventude no Desportu (SEJD) liuhosi programa Emprendedorismo Sosial Juventude Suku.
Tuir Alsino, programa ne’e loke oportunidade ba joven sira iha suku 50 iha Munisípiu Bobonaro. Iha tempu ne’ebá, programa simu proposta husi joven na’in 65. Depois halo asesmentu hamutuk ho Autoridade Munisipál no Ministériu Agrikultura no Peskas (MAP), no grupu 22 hetan apoiuho montante US$1,000,” dehan Alsino Lopes.
“Grupu 22 hetan apoiu ba programa Emprendedorismo Sosial Juventude Suku, tanba ita fó apoiu ba joven sira bazeia mós ba orsamentu ne’ebé iha” dehan nia
Iha parte seluk, Presidente Autoridade Munisipál Bobonaro hatete katak autoridade sei kontinua servisu hamutuk ho joven sira no fó atensaun ba sira nia preokupasaun, inklui problema bee ne’ebé afeta atividade hakiak ikan.
“Problema juventude nian, hanesan Presidente Autoridade, ha’u hakarak koopera di’ak ho ha’u nia joven sira. Ha’u la haree ba grupu A ka grupu B, maibé ha’u haree sira nu’udar povu Bobonaro, liuliu joven sira ne’ebé iha kreatividade rasik,” dehan Presidente Autoridade Munisipál Bobonaro.
Aleinde atividade hakiak ikan, iha mós grupu joven sira seluk iha Munisípiu Bobonaro ne’ebé investe iha setór agrikultura, inklui kuda modo, hakiak manu no atividade agrikultura seluk.
Discussion about this post