Projetu Reabilitasaun Estrada Halimesak-Lourvia Paradu Tinan ida ona.

Projetu reabilitasaun estrada rural Halimesak-Lourvia Postu Adminitrativu Cailaco, Munisípiu Bobonaro, paradu ona kuaze tinan ida.

Estrada ne’e  ne’e liga ba komunidade ne’ebe hela  iha Aldeia Maganuto, Suku Ritabou, Postu Administrativu Maliana.

Projetu ne’e ho distánsia  kilómetru tolu no hahú iha fulan Agostu 2024, ho servisu graveling, drenajen, plum concrete, bio-engineering no manutensaun rutina ho kontratu hamutuk Dollar Amerikanu 292.820.62.

Komunidade hatete katak estrada ne’ebé seidauk remata halo sira difisil atu asesu ba transporte no merkadu, no mós afeta seguransa iha estrada. Tuir informasaun hosi komunidade, durante períodu obra paradu, kareta tolu hetan asidente iha área ne’e.

Ema ho defisiénsia mós enfrenta difikuldade tanba tenki lao distánsia dook atu asesu ba transporte.

Anita Araujo, membru komunidade hatete katak kondisaun estrada ne’e halo nia sente preokupa.

Ho kondisaun difisiénsia, ami sente preokupasaun tanba ami tenki lao dook atu asesu ba estrada no transporte. Ba ami, situasaun ne’e halo ami sente difisil liután. Durante obra para, kareta tolu mós baku fila iha estrada ne’e,” dehan Anita Araujo.

Jerente Kompañia Dolivaria Unip. Lda JV Novalo Unip. Lda, Agostinho Vicente Santos, hatete katak obra paradu kontribui estragus ekipamentu konstrusaun.Nia mós rekuñese katak iha atrazu pagamentu saláriu trabalhador ne’ebé afeta servisu.

“Sira estraga mixer ne’e tanba sira-nia ezijénsia ba saláriu selu tarde. Sira-nia osan tarde tanba ita-nia governu ne’e iha Outubro no Novembru sistema pagamentu taka,” afirma Agostinho.

Agostinho hatete kompania sei kontinua halo serbisu no tuir planu projeitu reabilisaun sei termina iha fulan Dezembru tinan ida ne’e.

Xefe Suku Ritabou, Maximiano dos Santos, hatete katak nia fasilita ona diálogu entre trabalhador no kompañia kona-ba problema pagamentu. Nia husu ba kompañia atu kontinua obra, liuliu antes tempu udan.

“Kompania la selu traballador sira nia osan, sira hein kuaze tinan ida. Kompania sente difikuldade atu kontinua tanba kareta pezada ba konstrusaun hetan estragus, maibé ohin ita konsege rezolve no kompañia prontu atu halo fali konstrusaun,” dehan Maximiano.

To’o agora, komunidade hein atu kompañia kontinua servisu no remata reabilitasaun estrada ne’e.

Reporter: Vero Fernandes