Dili, 12/07/2024- Fundasaun CODIVA organiza Selebrasaun Mini-Pride tema “Solidariedade: Komunidade Ida ho Inkluzivu” no halo mós vizita mural kona-ba ema LGBTQI+ nia identidade no direitu ba espresaun, história badak kona-ba komunidade LGBTQI+ sira-nia moris, solidariedade ba maluk sira ne’ebé mate tanba ninia identidade, no múzika ne’ebé espresa LGBTQI+ sira-nia identidade.
“Objetivu husi Mini-Pride ida ne’e mak atu manifesta no sensibiliza ba sosiedade sira konta-ba valores umanus no direitu ne’ebé korelasaun ho individu ida nian aparensia no identidade, haforsa tradisaun no kultura inovativu hodi hodi haburas solidariedade iha família, kreda no nasaun,” esplika Rumiyati Barreto, Diretora Fundasan CODIVA sita iha Komunikandu Imprensa.
Liu husi selebrasaun ida ne’e Fundasaun CODIVA hakarak tulun no advoga liuhusi dalan solidariedade hodi konstrui sosiedade ida inkluzivu. Fundasaun CODIVA mós utiliza oportunidade ida ne’e atu promove partisipasaun komunidade LGBTQI+ nia liberdade atu espresa ho lian oi-oin inklui ninia identidade.
“Mini-Pride ida ne’e atu konsella foin-sa’e mane no mane adultu inklui sira atu bele simu identidade ema ida nian iha sosiedade nian le’et no enkoraja maluk LGBTQI+ sira nia liberdade iha movimentu sosiál no partisipa iha deskusaun importante sira,” aumenta Guerson Ribeiro, asistente programa Fundasaun CODIVA.
Iha Mini-Pride ne’e sei aprezenta história moris husi maluk transjeneru feto no transjeneru mane. “Aprentasaun halo hodi konsiensializa sosiedade atu respeitu maluk LGBTQI+-nia identidade no simu sira nu’udar sidadaun Timor-Leste ne’ebé iha direitu iguál ho sidadaun sira seluk. Hahalok ida ne’e mak ita presiza valoriza direitus umanus ne’ébé konsagra iha Konstituisaun Repúblika Demokrátika Timor-Leste,” tenik Guerson Ribeiro.
Mini-Pride ne’e mak atividade nu’udar parte ida husi Marsa Diversidade ka Pride March ne’ebé tinan-tinan halo iha Díli hahú husi tinan 2017, ho objetivu atu hasa’e vizibilidade ema LGBTQI+ no konsiensializa públiku kona-ba direitu iguál ema LGBTQI+ sira. Mini-Pride halo tanba Marsa Diversidade sei iha prosesu preparasaun nia laran no tuir planu hala’o iha fulan Jullu 2024 nia laran.
Fundasaun CODIVA konsidera Mini-Pride nu’udar espasu edukativu ba sosiedade em jeral atu bele eduka sosiedade hodi hatene karakter no identidade komunidade LGBTQI+ nian iha kontextu Timor-Leste. Fulan hira liu ba kotuk, iha loron 17 Maiu 2024 organizasaun MOFFE (Movimentu Feto Foinsae Timor-Leste) komemora Loron Internasional kontra Homofobia, Transfobia no Bifobia, ho objetivu hasa’e konsiénsia kona-ba violasaun direitu LGBTQI+ no estimula interese iha servisu direitu LGBTQI+ iha mundu tomak no mos iha Timor-Leste. Iha sosiedade Timor diskriminasaun bazeia ba orientasaun seksuál sei eziste nafatin iha prátika oin-oin hanesan iha família, servisu fatin, eskola, igreja, no instituisaun públiku sira.
Fundasaun CODIVA (Coalition for Diversity and Action) hanesan organizasaun ne’ebé maka legalmente rejistu iha FONGTIL (Forum ONG Timor-Leste) no legaliza husi Ministériu da Justisa Departamentu Notariadu hodi hala’o servisu atu asegura komunidade LGBTQ+ nia direitu iha Timor-Leste.
Partisipa iha selebrasaun Mini-Pride ne’e liuliu komunidade LGBTIQ+ nomos parseiru servisu sira hanesan, MOFFE-TL, CBRNTL, FMDC, inklui CODIVA no parseria sira seluk tan.
Jornalista: Natalino Ximenes
Discussion about this post