Dili – Diretora Media Halibur News ho naran kompletu, Dalia Soares Pereira, naran estimada Dalia (23). Husi Munisipiu Baucau Postu Administrativu Venilale. Moris iha loron 11 fulan Juñu, tinan 1999.
Dalia hahú nia estudu iha ensinu báziku Santo Antonio Veni-doko iha tinan 2006. Iha momentu ne’ebá nia hetan bolsa da mãe ne’ebé apoiu husi governu, kontinua ba eskola pre-sekundariu iha São Cristovão Venilale, maske hetan bolsa da mãe Dalia mos halo atividade iha uma mak kuda malus atu nune’e kolheta lori ba faan iha merkadu.
Feto Origem Baukau ne’e remata nia estudu pre-sekundáriu iha tinan 2014 no bolsa da mãe mós remata iha tinan ne’ebé hanesan. Dalia hahú nia estudu ensinu sekundáriu iha eskola Santa Madalena de Canosa Has Laran Dili, husi tinan 2015 no remata iha 2017, maske Dalia sei tur iha kadeira ensinu sekundáriu klase 2 nia hahu servisu voluntáriu iha Biblioteka Xanana Reading Room nu’udar recepsionista.
Hanesan lia fuan popular ne’ebé ema temi, saida mak o kuda, o sei kuu iha futuru. Dalia hetan mellor klasifikasaun iha ensinu sekundáriu no kontinua estudu iha universitario, hafoin ne’e Dalia deside hela mesak hodi buka rasik maneira atu bele sustenta ba nia nesesidade baziku liuhusi halo produtu es buah lori ba faan iha markadu Manleu iha oras meudia hodi hetan netik osan rahun ruma hodi sustenta nesesidade eskola nian.
Moris ne’ebe Dalia hasoru mak lakon domin husi inan-aman tamba inan-aman divorsiu (fahe malu), susar ba nia atu asesu di’ak ba estudu, nune’e Dalia sente menus motivasaun no suporta husi familia, dezafiu hirak ne’e la sai bareira ba Dalia nia prosesu moris, maibe motiva nia oinsa mak luta hasoru dezafiu hirak ne’e hodi bele atinji mehi ne’ebé nia rasik deside, tamba liu husi prosesu moruk hirak ne’e halo Dalia ultrapasa ba iha universitaria no dadaun ne’e nia sai hanesan estudante finalista iha Universidade Nasional Timor Loro Sa’e (UNTL), Fakuldade Siensia Sosiais, Departamentu Cominicação Social.
Foin sa’e feto ne’e la’ós de’it asesu ba edukasaun formal maibé nia mós aproveita tempu hodi asesu ba edukasaun non formal hanesan tuir kursu ingles, formasaun jornalizmu ne’ebé facilita husi UNDP iha UNTL durante fulan rua no mós tuir atividade oinoin ne’ebé relevante ho ninia estudu.
foto ekipa formandus entrevista direta ho Dalia
“Liu husi edukasaun formal no non formal hirak nee, aumetna ha’u nia kapasidade intelektual no halo ha’u brani no fiar an liutan hodi halo atividade sira iha ha’u nia moris loroloron” dehan Dalia, ba ekipa Formadus iha Kaikoli, Dili.
Durante halo nia estudu iha universitario iha tinan 2019 nia pratika iha Radio Akadémiku durante fulan neen(6). Hafoin ne’e, durante tinan 2 nia laran nia kontinua servisu hanesan jornalista iha Media Loluwari, Timór News no estajiu profesional husi UNTL iha Naunil Media. Tama tinan 2022 finalsita estudante Comunicação Social-UNTL ne’e harii rasik Media Online ho naran Halibur News hodi publika informasaun no sai mós fatin pratika ba estudante Comunicação Social no formandus iha area jornalizmu.
“Ita nia mehi ne’e laos mai de’it hanesan kalan ita toba hodi mehi, maibé nudar joven ita tenki esforsu no koko saida mak ita hakarak, no ha’u hanesan jornalista iha mehi ne’ebé bot hakarak sai jornalista profesional, no hakarak fahe saida mak ha’u aprende ho nune’e ha’u iha hanoin hodi harii media rasik no sai fatin ba ema seluk hodi aprende, atu nune’e ita nia susesu ne’e iha valor ba ema sira iha ita nia sorinsorin” tenik Dalia.
Fundadora media ne’e husu ba joven hotu-hotu, tenke gasta tempu ba buat ne’ebé fó vantajen ba moris, atu loron ikus labele arepende.
Discussion about this post