Dili – Servisu hanesan jestor/a la-haree ba feto ka mane maibé depende ba ita ididak nia esforsu no vontade. Realidade ne’e hatudu hosi jestora Rádiu Komunidade Rai-Husar Aileu, Maria Sarmento Guterres, tanba ho sentimentu voluntarizmu no vontande ne’ebé boot ikus-mai nia konsege lidera iha Rádiu Komunidade Rai-Husar, Aileu.
Emi naran estimadu husi Maria oan husi Emilio P. Guterres Faria no Domingas S. Soares, oan ba daneen (6) husi maun alin nain ualu (8). Husi familia nia suporta halo Emi iha espiritu bot hodi halao nia kna’ar nu’udar jornalista iha Rádiu Komunidade Rai-Husar hodi aprende no hetan esperiensia oioin to’o ohin loron hetan konfiansa jere radiu komunidade ne’e.
“Ha’u hahú servisu hanesan jestora iha tinan 2022 maski antes ne’e ha’u voluntáriu de’it iha Rádiu Komunidade ne’e, hodi fó espasu ba voluntáriu no estudante sira atu aprende, no hau mos aprende barak” Maria hatete ba ekipa formandus sira liuhusi telefone.
Dezde 2009, Maria servisu ona nu’udar voluntáriu iha Rádiu Komunidade Rai-Husar hafoin remata ninian ensinu sekundáriu hosi Colégio São Pedro e São Paulo, Aileu iha tinan ne’ebé hanesan.
Nia fiar katak liuhosi servisu voluntáriu, nia hetan esperiénsia lubuk ida hodi nune’e bele kontribui no apoiu ba ninia maluk sira ne’ebe hakarak aprende iha Radio Komunidade.
Durante tinan 13 feto orijem Aileu Aisirimou ne’e haknaar an nu’udar voluntáriu iha Rádiu Komunidade Rai-Husar no lahetan salariu hanesan funsioanariu sira seluk maibe hetan esperiénsia oioin, inklui formasaun lubuk ida iha área jornalizmu no apoiu mos hosi parte oioin iklui Plan International hodi apoiu ba programa labarik sira nian.
Ba Maria, esperiénsia mak lisaun ida boot tebes no ho lisaun sira ne’e, nia buka atu halo planu no programa oioin hodi eleva tan kualidade programa iha Rádiu Komunidade Rai-Husar, Aileu.
“Ha’u iha planu ba futuru atu hadi’a Rádiu Komunidade ne’e sai di’ak-liu tán, hodi servisu hamutuk ho ONG no governu liu husi SECOMS atu halo radio komunidade ne’e sai komundade nian , no akompanha ka fahe esperiensia sira ne’ebe durante ne’e hau hetan ba estudante sira ne’ebe hakarak aprende iha radiu ne’e” Maria hatutan
Jornalista ida iha Rádiu ne’e, Deolindo Bere Araújo, haktuir dezde Maria sai nu’udar jestora nia hahú halo kooperasaun oioin hodi eleva kualidade servisu no programasaun Rádio ne’e.
“Tuir ha’u-nia haree durante ne’e jestora ne’e lidera iha ona Mudansa ba Rádiu komunidade no fó mós benefiu mai ami tanba ami bele aprende barak iha-ne’e, aleinde servisu hamutuk ho organizasaun sira hanesan Plan International Timor-Leste no APHEDA hodi fó espasu ba ami iha área jornalizmu nian,” Deolindo hatete.
Molok remata feto ho idade 34 ne’e hatete foinsa’e sira iha poténsia barak atu kontribui ba dezenvolvimentu, inklui dezenvolvimentu munisipál, no nia apela ba feto maluk sira atu la-bele subar sira-nia matenek maibé hatudu liuhosi servisu hodi demonstra katak feto sira bele.
Reportajen: Ekipa Formandus Training GSR-4, Grupo 5
Editor/a: Desy Reis & João da S. Sarmento
Discussion about this post