DÍLI — Obra arte “Jumping Dolphins”, ne’ebé kria husi plástiku no lixu eletróniku, lansa ofisialmente iha kuarta-feira iha mural Sede BNU Timor, Díli. Obra ne’e lori mensajen kona-ba protesaun ambiente liuhusi reutilizasaun materiál, no iha tempu hanesan fó oportunidade ba artista Timor-oan sira atu dezenvolve sira-nia talentu.
Obra ne’e kria liuhusi kolaborasaun entre artista Portugés Bordalo II no artista Timor-oan sira husi Arte Moris, iha fulan Maiu, nu’udar parte husi eventu TasiFest.
Iha projetu ne’e, artista husi Arte Moris Evan Pereira servisu diretamente hamutuk ho Bordalo II. Evan hatete katak oportunidade ne’e importante tanba fó esperiénsia foun ba nia no permite nia aprende diretamente husi artista internasionál.
“Ba hau, oportunidade ida-ne’e importante tebes tanba hau bele servisu hamutuk no aprende diretamente hosi artista internasionál ida hanesan Bordalo II, ne’ebé nia obra arte urbana konhesidu iha mundu.” — Evan Pereira
Lansamentu obra ne’e mós partisipa husi Sekretáriu Estadu ba Arte no Kultura, Jorge Soares Cristovão. Nia apresia inisiativa ne’e tanba envolve artista Timor-oan sira no fó oportunidade ba sira atu hatudu sira-nia talentu.
Diretór Fundação TasiFest, Luís Simões, hatete katak objetivu projetu ne’e la’ós de’it atu kria obra arte, maibé mós atu fó oportunidade ba artista Timor-oan sira atu aprende no hetan esperiénsia liuhusi servisu hamutuk ho artista internasionál.
“Projetu ida-ne’e la’ós de’it kona-ba arte, maibé mós kona-ba oportunidade ba artista Timor-oan sira atu aprende, hetan esperiénsia no servisu hamutuk ho artista internasionál.” — Luís Simões
Luís mós subliña katak Timor-Leste iha artista ho talentu barak, maibé sira sei hasoru dezafiu iha hetan espasu no oportunidade atu hatudu sira-nia obra.
“Timor-Leste iha artista ho talentu barak, maibé sira sei hasoru dezafiu atu hetan espasu no oportunidade atu hatudu sira-nia obra. Tanba ne’e, ami sei kontinua buka dalan atu apoia no promove artista Timor-oan sira.” — Luís Simões
Lansamentu obra ne’e mós partisipa husi Sekretáriu Estadu ba Arte no Kultura, Jorge Soares Cristovão. Nia apresia inisiativa ne’e tanba envolve artista Timor-oan sira no fó oportunidade ba sira atu hatudu sira-nia talentu
Sekretáriu Estadu ba Arte no Kultura, Jorge Soares Cristovão, enfaze katak artista Timor-oan sira konsege ona partisipa iha eventu internasionál, maibé sira-nia vizibilidade sei presiza aumenta liuhusi papél media nian atu divulga no promove sira-nia obra ba públiku.
“Ami apresia no agradese ba Fundação TasiFest tanba bele envolve artista Timor-oan sira. Artista Timor-oan sira konsege partisipa iha eventu barak iha mundu, maibé sira-nia vizibilidade iha rai-laran no iha li’ur sei presiza aumenta tan.” — Jorge Soares Cristovão
Obra “Jumping Dolphins” forma golfinhu rua, uza plástiku no lixu eletróniku ne’ebé rekolla liuhusi kampaña iha festifal TasiFest. Projetu ne’e realiza liuhusi kolaborasaun entre BNU Timor, Fundação TasiFest, Bordalo II no Arte Moris.
Discussion about this post