Fundasaun CODIVA Hakarak Ema hotu Haree Komunidade LGBTQI+ iha Valores Umanu.

Dili, 15/03/2024- Funadsaun CODIVA harii iha 2014 no hetan legalizasaun husi Ministériu Justiça iha 2017. Fundasaun CODIVA eziste ho prinsípiu atu defende diretu ema hotu nian liuliu komunidade LGBTQI atu ema hotu respeita ema seluk nia orieatasaun seksuál

Codiva nia servisu mak halo advokasia ba komunidade no sosiedade liuliu ba iha grupu tarjetu hanesan estudante universitáriu, lider komunitáriu nomós ativista no foinsa’e sira.

Júlio do Carmo C. Amaral, Programa Officer, hateten Fundasaun CODIVA kontinua halo adokasia ho ativista, Estudante Universitáriu no Foinsae sira hodi fahe tutan no habelar edukasaun SOGIE ‘Sexual Orientation, Gender Identity and Gender Expression (Sigla inglés) ka Orientasaun seksuál, Identidade jéneru no Espresaun jéneru nunee komunidade sira hotu atu komprende no entende kona ba ezistensia komunidade LGBTQI+ hanesan ema umanu.

“Tanba iha sosiedade ita nota katak bainhira ema nia hahalok la tuir ema seksu nia hanoin entaun sira dehan ida nee diferente loos, entaun lori edukasaun SOGIE nee ba iha ativista sira atu halo mudansa ba norma sira nee, tanba ativista sira hanesan neon nain ba mudansa no hanoin atu halo mudansa, neneik maibé ba beibeik” Hateten Júlio hafoin halo advokasia iha sala Human Right Centre UNTL

Fasilitadór Domingos Alvés orgullu fasilita materia SOGIESC hodi hafanun joventude atu habelar informasaun ba familia kolega sira inklui estudante sira no foinsae ne’ebé presija hetan informasaun atu iha konsiénsia boot no simu ema hotu hanesan umanu no úniku

“Esperiénsia sira ne’ebé ha’u hetan fahe ba kolega sira, espetasaun ha’u nian mak ida nee hau hakarak ema hotu simu ema hanesan ema, la hare ba sira nia seksu, la haree ba sira nia identidade seksuál sira, liuliu ba maluk sira iha area rurais asesu ba informasaun husi média aprende saida de’it no fó valores no aplika ita valores ba ema hotu no haree ema hotu úniku” dehan Alves hafoin fasilita matéria SOGIE

No nia husu atu ema hotu buka difine no hatene kona-ba buat haat importante atu komprende karakter ema ida nian liu husi Orientasaun seksuál, Identidade jéneru, Expresaun jéneru no identidade seksuál atu nune’e respeita no simu komunidadee LGBTQI sira nia prejensa.

Frangelina Pereira konsidera matéria ne’ebé nia hetan importante tebes oinsa hanorin nia respeita nia maluk LGBTQI sira nia prezensa iha komunidade liuliu iha nia bairu no suku.

“Karik hau hetan hau nia LGBTQI sira neebe mak hetan presaun makaas husi sira nia família no kumunidade hau ko’alia ba sira katak sira mós iha diretu nuudar ita ema umanu” tenik Frangelina.

Advokasia ne’e hala’o ba foinsa’e sira hanesan Atvista KOKOSA, Estudante universitáriu, inklui membru CODIVA, no tuir planu sei halo mós ba profesores no dosente sira.

To ohin loron Fundasaun CODIVA seidauk iha dadus kompletu totál menbru LGBTQI+ maibé iha lista ne’ebé rejistu iha 500 resin.

Reportajen : Natalino Ximenes