Dili-Elisabeth Emilia Coelho, moris husi família ne’ebé feto ho mane hotu-hotu iha life skills importante, sai inspirasaun ho nia ideia brillante ne’ebé muda nia moris liuhusi nia negósiu Catering no Tein Nain.
Naran ofisiál ba nia kompañia Catering ne’e mak Marfara, naran ne’e akomula husi ema sira ne’ebé durante ne’e hadomi Noy la Iha Limitasaun, no naran ne’e mós rejistu ona iha Serve, husi ne’e nia aproveita oportunidade atu hetan rendimentu iha Timor-Leste husi servisu Catering hahan no halo cake ba eventu sira hanesan festa kazamentu, festa sarani labarik, no seluk tan.
Elisabeth ho naran estimada Noi, oan daruak husi Frans Manek (Falacido) no Margarida de J. Coelho, Noi hetan elojia husi nia inan rasik bainhira nia halo cake hodi fó prezente ba nia inan iha nia aniversáriu, esperiénsia hamosu espiritu emprezarial iha Noi hodi kontinua dezenvolve ninia kreatividade.
Estudante Lucia halo entrevista hela ho Noy feto kreativu
“hahu aprende husi família, espesifikamente husi ha’u nia mãe, no hahú hamutuk ho nia servisu nune’e inspira ha’u dezenvolve ha’u nia kreatividade iha uma liuhusi halo dosi no tein” Noi haktuir
Noi mós apriende barak husi turtorial ne’ebé ema fahe iha plataforma youtube hodi hariku nia abilidade no kreatividade.
Durante estuda iha Universidade da PAZ Noi uza rezultadu husi kosar ben hodi seluk rasik nia estudu to’o remata nia Lisensiatura iha Fakuldade Direitu.
Inan ba oan nain 5 deside kontinua mantein serbisu halo dosi no tein tanba nia iha paisaun ba serbisu ne’e desde sei kiik.
Feto ho idade 40 ne’e nia familia suporta tebes nia kreatividade nune’e bainhira iha ema balun ne’ebé order nia sempre hetan apoiu husi kaben mane no nia oan sira.
Kada orderan cake nia presu diferente hahu husi dollar Amerika 40.00 no cake ba festa kazamentu to’o dollar US 900, rendimentu ne’ebé hetan nia jere osan porsentu 60 hola materia prima ba no porsentu 40 mak sai rendimentu ba nia hodi responde ba nia nesidade seluk.
Noi senti kontente tanba nia sempre hetan suporta husi nia kaben mane no nia oan sira bainhira nia simu orderan.
Noy infeita hela Cake ba iha feta Kazamentu
“Dala ruma ha’u halo dosi to’o kalan liu ha’u nia kaben no oan ne’ebé bot ona sira sempre suporta ha’u, ha’u nia kaben ajuda hodi ba monta dosi kasamentu nian, no bainhira ha’u isin rua ka partu ha’u alista tiha sasan ne’ebé atu ba sosa ha’u nia kaben mak ba kompras, depois ha’u baku tiha dosi sira mak ajuda tunu to’o infeita dosi ha’u mak pinta rasik” Noy esplika.
Oan feto Genicia A. C M. Oliveira, agora dadaun estuda iha Universidade Dili (UNDIL), nia apresia ho esforsu husi nia inan ne’ebé tau matan ba nia to’o ohin loron nia estuda iha universidade.
“Ha’u kontenti haree ha’u nia inan servisu iha uma, halo dosi no catering. Resultadu husi sira nia servisu bele haree ami nia uma laran no mos ajuda ha’u iha estudu,” Genicia hatete.
Pedro Nheu hanesan laen husi Noi, espresa ninia sentimentu haksolok tanba hetan parseira ne’ebé halo atividade negosiu iha uma hodi suporta rendimentu família nian, no sira sempre kolabora di’ak.
“Nudar laen ha’u kontenti los tanba iha kaben ne’ebé mak uniko tebes, nia fo tempu barak hodi ajuda ami nia nesesidade familia, haree ba rendimentu ha’u nia kaben nia atividade ne’e hetan rendimentu bot liu fali ha’u nian, ho nune ha’u sempre suporta liuhusi ajuda ba kompras, baku dosi no monta dosi iha fatin festa kazamentu” Pedro haktuir.
Noi mós hasoru dezafius sira hanesan bainhira kliente kansela no kliente balun labele resposta telefone bainhira Noi prepra hotu ona, nune’e nia uza media sosial halo promosaun fali atu kliente seluk ne’ebé interese bele order fila fali.
Susesu seluk ne’ebé Noi atinji mak fó mós oportunidade servisu ba maluk feto no mane balun ne’ebé nia bolu hodi ajuda nia prepra hahan, ho nune’e feto kretividade ne’e iha mehi ba futuru konaba ninia negosiu mak hakarak iha fatin ne’ebé di’ak no bot atu nune’e bele kontinua nafatin halo negosiu ne’e loroloron no fó mós oportunidade servisu ba maluk sira seluk.
Reportajen : Lucia A. Pinto (Estudante Comunicação Social-UNTL)
Discussion about this post