Moris iha era ohin loron feto barak sai ona independente, ne’ebé mak la depende ona ba Inan Aman. Hanesan mitus ne’ebé sosiedade fiar katak, feto ne’e nia direitu atu servi iha uma-laran de’it, maibé realidade ne’ebé ami hasoru iha feto balu halo ona mudansa ba mitu sira ne’e. Hanesan feto foinsae ida ho naran Cecília Osório Bianco de Araújo, ne’ebé konta kona-bá atividade ne’ebé nia halo no mós fó servisu ba foinsae feto sira seluk, no harii ninian negósiu arte liman-ain-kukun (Nail Art) OMD iha tinan 2021.
Cecília ho naran estimada “Maila”, oan feto dahuluk hosi Aman Osório Bianco Ximenes de Araújo no Inan Ofélia Angelina de Araújo, moris iha Ainaru loron 5 fulan Novembru tinan 1998. Iha maun alin hamutuk hitu (7). Cecília hahu eskola primária iha Seulau tinan 2005 too 2010, no kontinua pre-sekundária no sekundária iha eskola Santa Maria Ainaro (SAMARIA), hahu hosi tinan 2011 too 2016. Remata iha sekundária kontinua foti kursu direitu jerál iha Universidade Nacional Timor Lorosa’e (UNTL) agora dadaun nu’udar estudante finalista.
Cecília akumula mós esperiensia organizativa no instituisional oin-oin hanesan, Organization Save The Children iha tinan 2011, Parlamentu Foinsae hahu hosi tinan 2013 too 2016, Rotary Club, no mós fundadora ba Asosiasaun Joventude Hakbi’it Justisa Timor-Leste (AJHJ-TL) iha tinan 2020 to’o ohin loron.
Feto origem Ainaro ne’ebé iha kapasidade kria rasik negósio ki’ik kona-bá Nail Art (salon liman kukun ka ain kukun), ho objetivu harii negósiu ida ne’e hanesan estudante hakarak kria rasik rendimentu ba nia aan atu labele depende ba Inan Aman.
Foto Privadu Maila
“Inisiativa atu promove talentu, tanba ha’u iha abilidade maka’as kona-bá dezeña, hosi ne’e halo ha’u iha hanoin katak hosi talenta ne’ebé iha bele tranzforma ba parte importante balu hanesan Nail Art, no sai feto kreativu no ikus bele fó mentalidade atu kria kampu de traballu ba hau nia aan rasik, Timoroan sira liliu ba joven feto sira atu labele vulnerável deit iha uma,” Maila hatete.
Feto ho idade 24 hateten, loke negósiu la envolve aan iha kursu ruma, maibé utiliza mudansa teknlojia sira nebe ohin loron dezenvolve no aproveita hodi halo buat ruma ne’ebé mak suporta atividade iha moris loron-loron.
Maila realsa: “Hau utiliza youtube hodi aprende rasik antes loke hau nia negósiu, no sosa materiál sira ne’ebé hau presiza uza osan jajan no mós osan ne’ebé hetan hosi atividade seluk, no hahu koko uluk Nail Art iha uma laran, haree ba nia kualidade di’ak hafoin halo publisidade ba kliente sira liuhosi media sosial (facebook, whatshap,)”
Maila informa katak liuhosi publisidade iha media sosial ba negósiu kiik ida ne’e dada tebes kliente sira atu hakbesik ba Nail Art, prezensa hosi kliente sira loron ida hetan osan $200 kada loron no mós bele liu.
“Osan ne’ebé hau hetan kada loron bele ajuda mós hau atu selu hau nia staff sira no mós bele ajuda hau nia alin sira ne’ebé mak sei ki’ik tanba hau mak sai nu’udar oan dahuluk ba iha família ida ne’e,” Maila haktuir.
Maila nia atividade iha Salon Nail Art, pinta cliente nia liman kukun
Maila informa negósiu ki’ik la fó rendimentu bo’ot ba ita maibe hanorin ita oinsa atu buka osan rasik nune’e aban bairua forma família hatene ona buka osan rasik no la dependensia de’it ba mane iha futuru, no iha mós kolega no família sira nebe sempre suporta hodi halo negósiu ida ne’e, no nia iha esperansa ba iha futuru hahu hosi Nail Art ne’ebé nia loke iha Capital Dili aban bairua mós hakarak atu loke mós iha hau nia munisipiu rasik hanesan Ainaru. Oan feto hosi Osório no Ofélia, nia negósiu ne’e hetan legalizasaun hosi serve iha tinan 2022, antes halao negósiu Nail Art ida ne’e.
“Liafuan ba feto maluk sira mak, hamriik rasik iha hau-nia ain hodi enkoraza maluk feto sira atu labele dezafia an katak ita feto laiha podér atu halo buat ruma, maibé tenki enkoraza aan feto bele, ita bele kuandu ita iha vontade” Maila enkoraja
Tuir observasaun jerál hosi ekipa iha fatin refere, bainhira ami dada lia ho fonte, iha kliente barak mak ba vizita fatin ne’e no balu mós sosa dadauk sasan balu e kliente balu mós hein atu halo Nail Art ba sira nia liman kukun no ain kukun.
Ekipa kobertura mós observa katak Maila iha kaspasidade no mentalidade ida di’ak tebes tanba kria mós campo de trabalho ba ita nia feto maluk ne’ebé laiha servisu, ida ne’e sai ezemplu di’ak no bele motiva feto maluk sira seluk.
Reportajen: Ekipa Formandus Training GSR-3, Grup 6
Discussion about this post