RENOÇENCIA “Mane De’it Bele Suku Roupa Tanba Sá Ita Feto Labele Hadi’a Kareta”

Dili-Servisu mekániku la haree ba feto ka mane, maibé depende ba ema ida-idak nia vontade no paisaun,  realidade hatudu, husi estudante Universidade Nasionál Timor Lorosa’e Fakuldade Enjenária, Renoçencia  Baptista dos Santos Amaral.

Feto ho idade 31 ne’e hateten durante estuda iha Universidade nia apriende liu ba iha área mékaniku oinsá halo manutensaun viukulu liliu kareta no motor sira. Aleinde ne’e nia mós estudu prátika durante fulan 6  iha patrimóniu estadu hodi hadi’a viukulu estadu ninian hanesan sobu roda, troka oli no halo manutensaun ba ekipamentu viukulu seluk tan.

“Mekániku ne’e ita boot sira hotu hatene katak todan , tanba hit besi todan. ita kaer oli foer dala-ruma ema hakribi ema bolu ami dehan oli dois, maibé ha’u esforsu, tanba ha’u nia paisaun  hili ona mekániku entaun tenke hatudu espíritu hodi halo serbisu. Dehan Nia.

Nia hatutan benefísiu husi estuda mékanika mak nia bele halo manutesaun rasik ba  nia transporte bainhira hasoru problema iha dalan.

“dala ruma ita viajen ita hasoru problema kiik ruma ba ita nia transporte  ita iha ona abilidade ita bele hadi’a mesak lapresija hein tan ema seluk” tenik Renoçencia.

Foinsa’e naturalidade Likisá ne’e iha  mehi boot hakarak loke ofisina hodi kria rasik kampu serbisu ba nia án no mós feto sira ne’ebé iha interese ba serbisu área mékanika.

“Ha’u hakarak loke ha’u nia bengkel ki’ikoan ida,  maibé ha’u sei rekolla hau nia fundus rasik” nia planeia.

Finalista Fakuldade Ejenaria UNTL, hetan suporta bot husi familia hodi halao nia estudu to’o ohin loron no nia enkoraja ba feto maluk sira, labele moe no ta’uk atu aprende buat ne’ebé fó benefísiu ba nia an no sosiedade no labele haree katak mékaniku só mane de’it mak bele  maibé bainhira iha paisaun bele apriende. 

“Hanesan joven, hato’o ba ha’u nia feto maluk sira labele moe atu espresa saida de’it mak ita boot sira bele, por ezemplu, mane de’it bele suku roupa tanba sá ita feto labele hadi’a karreta ida” nia hakotu.

Reportajen: Ekipa Formandus Training-2

Editora: Desy Reis