JACINTA XIMENES, FETO NE’EBÉ HARII EKONOMIA BAZE LIUHOSI KOOPERATIVA

Jacinta Ximenes mak figura ida ne’ebé pratika duni liafuan ‘buka matenek hodi harii ita rai’. Liuhosi Credit Union Builale (CUB), graduada UNPAZ 2011 ne’e buka atu ajuda rezidente sira iha Suku Builale iha Postu Administrativu Ossú hodi dezenvolve Builale.

Liuhosi CUB, Abua (naran estimada hosi Jacinta Ximenes), fasilita komunidade sira iha Builale asesa kréditu ho juru 2% de’it atu dezenvolve setór ekonomia iha Builale.

Abua ho nia kolega 21 harii grupu no servisu ida hodi fasilita impréstimu osan ho montante ki’ik iha 2011, maibé iha 2018 transforma an ba kooperativa ida ho naran CUB.To’o ohin-loron, membru hosi kooperativa CUB hamutuk 160 (feto 76 no mane 84) no iha kapitál hamutuk $1,140,103.

_{Momentu 2022 Jacinta foto hamutuk ho Eis SECOOP, Sr. Elizario no nia membru sira hafoin hetan segundu lugar nudar kooperativa nebe iha jestaun diak iha TL.}

Abua haktuir katak ideia atu hahú kooperativa ne’e mai hosi ninian kaben, Marcelino Belo, ne’ebé durante ne’e apoiu nia.
“ha’u hanoin hodi harii kooperativa ne’e tanba hetan apoiu maximu husi ha’u nia kaben mane, ne’ebe ajuda fo ideias no asaun sira hodi hamrik metin to’o ohin loron”

_{Jacinta ho membru CUB, habelar informasaun ba komunidade kona ba kooperativa}

Ninia kaben nia liafuan ne’ebé nia sei lembra mak katak “Mai ita hamutuk dezenvolve ita-nia suku hodi sai suku ida ne’ebé mak kriativu no inovativu liuhosi dalan kooperativa.”
Suporta ne’ebé foin sa’e feto ne’e hetan husi mos ema sira ne’ebé besik iha nia sorinsorin halo nia tulun mos komunidade sira ne’ebé presiza osan urjete ba nesesidade liuhusi fo impresta osan no fahe informasaun kona ba kooperativa ne’e. Diretora ne’e espera atu iha futuru membru sira bele hetan moris-di’ak no prepara futuru ida ne’ebé di’ak-liu ba nian oan sira hodi dezenvolve fali sira-nia suku.
“hau iha esperansa bot ba hau nia membru sira iha kooperativa ne’e, ba oin sira bele uza didiak osan husi kooperativa ne’e hodi hadia familia nia moris no mos moris independente iha sosiedade nia let’’

CUB agora hetan ona legalidade hosi Servisu Notariadu Ministériu Justisa nian nu’udar sosiedade kooperativa ida ne’ebé servisu hodi hamenus problema ekonómika oioin iha Suku Builale no Timor-Leste ein jerál.

Reportajen: Ekipa Formandus Training GSR-3, Grup 4

Editor/a: Desy Reis & João da S. Sarmento