Ermera,24/02/2023-Moris iha mundu ne’e hanesan dazáfius ida ema balun moris iha harmónia no kontente ho familia ne’ebe kompletu no balun moris iha kiak no mukiit nia laran no mos iha presaun nia laran bainhira lakon familia inan no aman.
Realidade iha suku Katrai Leten Aldeia Lomotou, Postu Administrativu Lete-Foho, Munisípiu Ermera, iha labarik mane ida ho naran Adaõ de Deus tinan 14, Nia iha mehi hakarak sai profesór maibé mehi furak ne’e monu nabeen de’it tanba wainhira sei iha prosesu nia laran Joven mane ne’e hasoru nakukun ne’ebé falun Metin nia hodi la ultrapasa dalan ne’ebé nia hakat baa.
Oan ki’ak ne’e Konta Tuir katak nia Aman Hakotu iss iha Tinan 2017 husik hela nia ho nia Ama mesak, hafoin iha Tinan 2021 nia Inan mos Mate hodi husik hela nia mesak hanesak Oan ki’ak.
“Ha’u nia inan -aman mate hotu bainhira hau sei ki’ik no ha’u rasik desidi para eskola iha klase 5° anu Ensino Baziku Sentral Katrai Leten tanba laiha ema ne’ebe mak atu suporta nia ba eskola, ho ida ne’e ha’u rasik desidi para eskola hodi halo to’os no buka osan rasik, tuir historia ne’ebe sira konta mai ha’u katak apa ba ku’uk kafe hodi buka osan maibe moras akontese ba apa entaun lori ba hospital hodi hetan tratamentu husi doutor sira no simu aimoruk, apa hemu la tuir reseitas mak aimuruk lanu apa hodi hakotu iss iha tinan 2017, no ha’u sei iha tinan 4. no iha tinan 2021 Ama mos Mate tuir istoria ama ba toos hodi buka hahan depois fila momentu udan boot entaun ama hakur mota mak mota lori hakotu kedas ama nia Vida hodi husik hela ha’u mesak”, Nia haktuir ba Jornalista sira ho mata been bainhira nia hamos hela duut iha toos laran, Iha suku Katrai Leten, Aldeia Lomotou Postu Administrativu Lete Foho Munisípiu Ermera.
Mane Mesak ne’e haktuir, dadaun ne’e nia hela ho familia husi Aman nian ne’ebe mak hare nia hanesan mos sira nia oan hakiak, maibe aman ho inan hakiak labele ajuda ba eskola tanba sira nia kbi’it la to’o tanba sira mós iha oan nain 4 ne’ebe mak eskola hotu.
Maske nune’e Oan ki’ak ne’e hakarak tebes atu atinje nia Objetivu no Mehi ne’ebé iha, maibé laiha ema ida mak suporta atu kontinua estudu, no nia iha Esperansa katak futuru sei hetan ema ruma hodi ajuda no bele atinji nia objetivu.
“Ha’u espera katak iha futuru oin mai iha ema ruma ne’ebe laran luak hodi ajuda ha’u ba fali eskola no ha’u mos prontu tebes atu eskola bainhira sira haruka atu ba eskola iha fatin ne’ebe de’it ha’u prontu naran katak iha ema ruma ajuda ha’u, tanba ha’u tanba ne’e ha’u husu ba nai ulun sira liliu ba xefe suku Katrai Leten buka took manera balun hodi hare ba ha’u ne’ebe moris hanesan oan ki’ak no laiha uma, ajuda mos ha’u atu halo dukumentus ruma hodi ha’u bele hetan subsidiu hanesan oan ki’ak, no bele kontinua fali eskola tanba hau lakon lo’os esperansa ba moris ida ne’e, tanba laiha ai-hun ida mak fo mahon mai ha’u”, Oan kiak Konfesa tuir ba Jornalista sira ho sentimentu triste.
Maske hela ho familia Adão De Deus la tur hodi hein de’it, nia nafatin servisu hodi ajuda falimilia, nia atividade loro-loron mak buka osan iha kualker servisu hanesan hili Fatuk ret ida $15.00 no pinera Rai-henek ret ida $15.00 no nia mos buka rai metan iha kafe laran hodi fa’an kada saka $ 3.50 no Osan sira ne’ebé nia hetan balun fó ba nia Inan-Aman hakiak no balun uza ba nia Nesisidade.
Abel de Deus nu’udar xefe Aldeia Lomotou rekoñese katak, Los duni Adaõ ne’e oan kiak, nia inan-aman mate hotu no husik hela Adaõ mesak sei ki’ik nia no mesak de’it laiha maun alin ka feton ruma, Ho nune’e sira hotu tau matan ba Adaõ no fó moris ba oan ki’ak ne’e liu husi kbiit ne’ebé sira iha. Autoridade lokál ne’e haktuir tan, sira mos buka hela maneira balun hodi responde ba moris ne’ebe Mane Mesak ne’e hasoru maibe to’o agora seidauk hetan dalan ka resposta ba oan ki’ak ne’e.
Mane oan kiak husi Aldeia Lamotou, Lete-Foho-Ermera ne’e hakarak tebes atu kontinua estudu hodi Atinje nia Mehi, Maibé nia laiha kbi’it no forsa rasik, tanba kbi’it no forsa ne’ebé suporta nia tenki husik hela nia Mesak bása domin Aman Maromak nia Furak liu ba Adão nia Pai no Mãe, hodi husik hela nia mesak hodi halo dalan ne’e nia hakat nakukun tebes.
Moris ne’e hanesan bareira boot ida ne’ebe mak hamout hotu Adaõ nia mehi furak sira, no hafalun nia iha nakukun laran, hanesan bibi ne’ebe laiha nain, laiha mos luhan nune’e hanesan mos Adaõ lakon nia heroi mak inan-aman no laiha maun alin feton sira sira hodi haforsa nia.
Oan mane mesak husi Aldeia Lamotou suku Katrai Leten, Letefoho Munisípiu Ermera ne’e jornalista sira hetan tanba OXFAM Timor-Leste ho AJTL servisu hamutuk hodi realiza Média Tour no koloka Jornalista sira ba iha Munisipiu Ermera atu hare Kondisaun no Situasaun iha Muníspiu refere.
Jornalista : Natalina de Araújo
Editor : Natalino Ximenes
Discussion about this post