DILI_08/02/2023. Governu liu husi Ministério Finanças ho Japan International Cooperation Agency (JICA) nafatin iha kooperasaun di’ak hodi tulun voluntáriu sira husi Japaun atu mai apoiu servisu iha Timor-Leste.
Japaun liu husi JICA kuarta-feira ne’e hasoru malu ho Vice-Ministro Finanças António Freitas hodi ko’alia kona-ba programa voluntáriu nian husi nasaun Japaun ne’ebé durante ne’e hala’o atividade iha Timor-Leste.
Vice-Ministro Finanças hatete, programa voluntáriu la’os programa foun maibé programa ne’e hahú ona iha tinan 2010 to’o ohin loron. No nia dehan programa voluntáriu ne’e fó benefisiu makas ba Timor-Leste liu husi servisu ne’ebé voluntáriu halo iha organizasaun sira.
Vice-Ministro Finanças António Freitas
“Programa voluntáriu JICA iha Timor-Leste hahú iha tinan 2010 to’o agora, no programa ne’e mós fó benisifiu di’ak tebes ba Governu Timor-Leste liu husi atividade voluntáriu sira nian ne’ebé kontribui ona ba Timor-Leste. Nia hatete hafoin hasoru malu ho JICA iha Minístério Finanças, Aitarak Laran Dili, loron 08-02-23.
No nia informa programa voluntáriu JICA husi tinan 2010 to’o ohin loron, Governu simu voluntáriu hamutuk ema na’in 121, tamba ne’e nia apresia ba povu no Governu Japaun liu-liu ba joven sira ne’ebé hakarak mai hodi ajuda no kontribui ba Timor-Leste.
Governante ne’e mós iha esperansa katak, ligadu ho voluntáriu nain 5 lima ne’ebé foin mai sei servisu hodi hadi’ak di’ak liután iha área ne’ebé sira servisu bá no liuliu nain ida ne’ebé sei servisu iha Serviço Autónomo de Medicamentos e Equipamento de Saúde (SAMES) oinsa bele ajuda aimoruk ba iha parte saúde nian.
Ito Mimpei nu’udar Chefe Representativu hatete nia kontente tamba Governu Timor-Leste no Governu Japaun sei iha kooperasaun di’ak hodi fó biban ba voluntáriu sira servisu iha Timor-Leste.
Nune’e mós Tomohiro Kato hanesan voluntáriu ne’ebé foin mai Timor-Leste no sei hanorin materia Edukasaun Físika iha eskola CANOSSA hateten nia prontu kontribui ba Timor no sei kapasita estudante sira iha área Desportu.
Tuir planu ne’ebé iha, tinan ida ne’e 2023, JICA sei haruka hamutuk voluntáriu nain 20 mai apoiu Timor-Leste no iha mós planu ba tinan oin sei haruka mos voluntáriu 20 tan, hamutuk voluntáriu 40, hohi kontribui ba iha área ne’ebé Timor-Leste prejisa tuir kooperasaun ne’ebé iha.
Discussion about this post