Radio, online – 4 Outubru, 2012, oinsa atu mantein mídia sira ninia independensia no integridade tenke iha separasaun entre estrutura politika editorial nian no estrutura kompania mídia nian, nune’e kompania nia nain sira labele interven makas ba iha politika editorial ne’ebé iha, dehan Jornalista Senior Hugo Fernandes ba Radio Liberdade Online foin dadauk ne’e.
Faktu hatudu katak, ema sira husi estrutura kompania nia ba editorial mak sai fali prezidente ba asosiasaun sira no ne’e interelasiona hotu kedas, nia afirma.
“Sira nia konflitu interese bo’ot iha ne’ebá. Laiha separasaun ne’ebé klaru. Se ha’u pemilik mídia ha’u labele mete politika editorial,” nia esplika.
Hugo hato’o lia hirak ne’e hodi responde ba informasaun kona-ba politika editorial husi mídia [jornal] balu ne’ebé deskunfia hetan influensia husi politiku sira no ema bisnis balu.
Membru konseilu Asosiasaun Jornalista (AJTL) ne’e haktuir katak iha Timor-Leste pozisaun sira ne’e sai hanesan fali ‘locomotive’ hodi lori ema sira ne’e to’o iha fatin ne’ebé deit sira harak.
“Iha ita nia rain, pozisaun sira ne’e hanesan fali locomotive atu lori ita to’o iha ne’ebé, ne’e ita nia hakarak.”
“Tamba ne’e mak asuntu sira hanesan ne’e mosu ita nota kedas. Mídia ida nia editorial la brani foti desizaun tamba nia tenke mantein hela ninia interese ne’ebé nia sei hetan husi ema ruma ou parte ruma,” nia salenta.
Nia hatutan tan katak, konflitu interese saida deit mak mosu iha ezistensia kanál mídia nia let sai ameasa boot ba liberdade imprensa iha Timor-Leste.
“Ne’e sei sai ancaman boot ba kebebasan pers iha ita nia rain. Kuandu akontese hanesan ne’e duni, klaru ke ita sei moris nafatin iha situasaun ida hanesan ne’e.”
“Tamba ida ne’e mak ha’u uluk kedas hateten ona katak presiza iha separasaun klaru iha mídia nia laran,” Hugo haktuir.
Eis Jornalista Talitakum ne’e husu mídia sira, liuliu jornalista sira hotu atu ho atem brani kontinua públika lialos bazea faktu no objetividade.
Hugo foti asuntu ne’e hodi kritika maka’as ba jornal nasionál balu tamba sira públika deit deklarasaun Ministru Justisa, Dionisio Soares Babo nian deklarasaun no lai inklui vitima, Luisa da Costa ninia resposta.
Tuir nia, mídia iha dever tomak atu públika akontesimentu saida deit mak mosu, se lae ema kestiona mídia nia funsaun nu’udar kontrolu sosial.
Xefi redasaun jornal Timor Post, Santina de Araujo dehan, durante ne’e Timor Post iha parte redasaun nunka hetan influensia politika ruma husi partido nomós lider sira. Publikasaun hotu-hotu bazeia ba politika redasaun jornal nian.
Iha fatin seluk Diretor jornal Independente, Mouzinho Lopes dehan, notisias hotu-hotu sei diskuti iha ekontru editorial nian, hafoin mak públika.
Discussion about this post