Radio, online – Partio FRETILIN seidauk desidi hodi hola parten iha formasaun V governu konstitusional. Maske antes ne’e Bloku Governu Koligasaun (BKG) liu husi karta ida hodi komunika ona ba partido FRETILIN.
Tuir informasaun Prezidenti CNRT, Kay Rala Xanana Gusmao haruka karta ida ba Partido FRETILIN hodi bele hola parte iha V governu konstitusional. Maibe kestaun ne’e partido FRETILIN rasik seiduak bele disidi, tamba seiduak iha informasaun ruma.
“Hau seidauk bele hateten, tamba wainhira iha ona hau nia oin mutin ou metan, hau hatete atu disidi ou lae, ida ne’e ikus. Hau dehan karta ida ne’e mai ona ami, ami sei hare oinsa bele ajuda ideias. Ami atu partisipa ou lae ami iha Prezidenti partido, sekertairu jeral no orgaun sentrais partido,”dehan Prezidenti FRETILIN Francisco Guterres ‘Lu-Olo’ ba jornalista iha uma fukun PN, (1/8).
Lu-Olo haktuir, karta ida ne’ebe fo mai husi prezidenti CNRT ne’e Lu-Olo seiduak bele fo sa ninia objetivu lolos ba media, tamba karta ne’e sei dirizi ba Lu-Olo deit.
“Hau labele le’e objetivu husi karta ne’e rasik ba imi media sira, tamba karta ne’e ba hau deit,”dehan Lu-Olo.
Hatan ba informasaun husi Prezidenti FRETILIN, Sekjer CNRT Dionisio Babo dehan, informasaun ne’e sala no lalos. Karta ne’e hanesan komunikasaun a nivel lideransa partido, ne’ebe Prezidenti FRETILIN Lu-Olo husu atu iha diskusaun ho sentidu aprezensia politika luan, konaba futuru nasaun ne’e nian.
“Prezidenti CNRT konkorda maibe depois forma tiha koligasaun, prezidenti CNRT mos la kore an husi faktus,”dehan Dionisio.
Sekjer CNRT ne’e taka hodi dehan, iha posibilidade BGK atu bolu FRETILIN tama iha estrutura membru governu, ne’ebe Dionisio la bele temi lolos tamba oras ne’e sei diskuti hela seidauk iha desizaun final. Presiza iha diskusaun enterior.
Discussion about this post