Radio, online – Dekanu Fakuldade Siensia Sosiais i Politika iha Universidade Nasional Timor Lorosa’e, (UNTL) Martinho Pereira fo nia hanoin katak, violensia agora dadaun lao ne’e ninia afeitu mai husi kongresista CNRT balun ne’ebe hasai lia fuan insultu no trata partido balun ho ida ne’e konsedera laiha maturidades politika. Liliu kongresista sira balun mai husi distritu.
“Kilat tarutu iha dia 15 Jullu kalan mai husi politika ne’ebe la tetu no la sukat hodi koalia ba publiku hodi hatun partidu balun ne’ebe mak hamosu konflitu” dehan Dekanu
Tuir Dekanu ne’e, ema hotu iha liberdade politika no garante demokrasia no hato’o ninia statmentu no opiniaun maibe liafuan sempre sukat no balansu tanba ema seluk mos iha nia sentimentu no direitu no labele hatun dignidade ema ida nian ou partidu ida nian.
“Lideransa politiku tenke koalia ho diak tanba ninia efeitu no impaktu ne’e povu ki’ik mak sei sente iha nia moris,”nia komenta.
Dekanu hatutan, hahalok sira ne’e akontese hanesan povu no politika nain sira ne’ebe ho maturidade politka sei fraku.
Nia reforsa katak politika nain sira tenke ezerse duni nia politika hodi kria buat ne’ebe mak diak ba ema hotu no ema hotu nia hakarak no ema hotu nia moris diak iha future.
“Hau haree hanesan kauza ki’ik oan ne’ebe iha ita nia sistema demokratiku ida ne’e no fiar katak ita nia lideransa sira sei iha kbi’it atu resolve no hakmatek situasaun ida ne’e” tuir nia haree.
Tuir dekanu ne’e katak kauza ne’e mos hanesan papel Presidente da Republika para hodi haree no oinsa mak hodi garante estabilidade iha nasaun ne’e.
“Ita nia Presidente Republika hanesan lider maximu iha nasaun ne’e nia papel mak oinsa mak bele hakalma situasaun ne’e ho maneira ne’ebe mak diak hodi nune’e ita labele monu tan tentasaun hanesan iha 2006,”tuir dekanu
Nia salienta katak nudar lideransa politika ou partidu ne’ebe mak hetan asentu parlamentu iha obrigasaun mos atu ajuda no oinsa mak atu bele hakalma situasaun ida ne’e.
Maibe la’os sira ne’ebe tu’ur iha parlamentu deit ita hotu iha obrigasaun para estadu ida ne’ebe direitu demokratiku ne’e laos ema ida nia no laos lideransa politiku nian mesak maibe ita nia liu sakrifisiu ne’ebe bo’ot.
“Ita bele haksesuk ba malu kona ba buat balun maibe keta haluha katak ita hotu tenke garante estabilidade ba nasaun ida ne’e” dekanu informa
Akontesimentu ida ne’e hanesan falansu ida husi ita nia maturidade politika ne’ebe mak fraku entaun presizamente ba oin tenke hadia no habo’ot liu tan ita nia maturidade ne’e liu husi aprende kona ba kestaun demokrasia ne’e rasik hodi nune’e ita labele sala utilize sistema demokrasia ne’ebe mak ita adopta.
Discussion about this post