Radio, online – Militante FRETILIN ho naran Armindo Soares Pereira hetan tiru mate husi oknum Polisia Nasional Timor Leste (PNTL) iha suku Hera, Sub-Distritu Metinaru, Dili.
Akontesementu ne’e mosu iha Segunda dader tuku 09:00 otl, (15/7). Vitima ne’e hein hela kareta atu ba estudu iha universidade.
Vitima iha loron Sabadu ba Hera atu foti osan eskola iha nia inan, ne’ebe hela iha Hera. Vitima ninia hela fatin iha Becora, tamba eskola iha Dili.
Vitima hanesan mos estudante Universitas Dili (UNDIL), Fakuldade Relasaun Internasional, semester III.
Vitima nia inan, Ana Filomena Asis da Silva alias Bilesa ba radioliberdadedili online liu husi via telefone hateten katak, akontesementune mosu iha tuku 09:00 otl, wainhira vitima haris hein kareta atu ba estudu iha UNDIL.
Iha kareta polisia tun mai, tamba ne’e vitima halai tama uma maibe polisia duni tuir hodi ba kaer iha uma laran. Iha kapturasaun ne’e polisia tuku dala tolu. Depois vitima hakialr dehan, “maun hau la sala ida, hau la sala ida, maibe polisia ne’e dehan o bosok, hodi vitima tula ba kareta,”dehan Bilesa ne’ebe hare hela ba akontesementu ne’e.
Iha kareta laran oknum polisia ida lori pistola tiru iha vitima nia kotuk laran. Iha kareta laran Bilesa rona lia ida dehan “Hau mate ona,”haktuir Bilesa ne’ebe vitima hato’o lia fuan ikus.
Hare ba vitima nia kondisaun grave, polisia lori kedan ba Hospital Nasional Guido Valadares (HNGV). Agora dadaun mate isin tau hela iha mortuariu hodi hein prosesu otopsia no investigasaun.
Prezidenti FRETILIN, Francisco Guterres ‘Lu-Olo’ ba jornalista hafoin hasoru malu ho Prezidenti da Republika Taur Matan Ruak dehan, vitima ne’ebe mate iha Hera ne’e nudar militante FRETILIN.
“Ida mate ne’e ami nia militante, ami FRETILIN mak sempre mate hahu husi resistensia to’o ukun-an,”dehan Lu-Olo.
Discussion about this post