Radio, online – Partidu Democratiku (PD) fo kriteria ba partidu politiku CNRT no FRETELIN katak formasau V Governu la bele involve ema independente ne’ebe laiha partidu. Se kriteria ne’e mak la tuir, PD prontu sai opozisaun.
“PD iha kriteria, waihira halo koligasaun mak ema independente la bele tama iha governu nia laran. Ema ne’ebe la iha hanoin ba ukun rasik aan ne’e labele tama governu. Ita bele respeitu politika rekonsiliasaun, maibe iha sensibilidade ba ukun rai ida ne’e tenki iha duni nasionalismu hodi bele servisu povu,ˮ afirma sekretariu Jeral Interino PD, Samuel Mendosa ba Jornalista sira iha serde nasional PD, Colmera, Tersa (09/07).
PD sujere atu partidu ne’ebe deit mak ukun, tenki ema husi partidu nia no ema independente labele ejiste iha governasaun ne’ebe forma ba tinan lima mai ne’e.
Maske nune’e Samuel dehan, sei partidu FRETILIN no CNRT la simu kriteria husi partidu PD nian, aportunidade PD ba iha opozisaun iha Parlamentu Nasional durante tinan lima nia laran.
Tuir Samuel katak, PD iha kadeira 8 deit maibe sei sai determinante hodi forma governu, tamba PD bele ba hamutuk ho FRETILIN no bele hamutuk mos ho CNRT hodi forma governu.
“Agora ne’e sira (CNRT ka FRETILIN) mak mai bolu ami la’os ami mak ba bolu fali sira, tamba ami iha kadeira 8 ne’e mak ami ba ne’e orsida ladi’ak ona,ˮ hateten Sekretariu Geral InterinoPD.
Nia dehan, PD hakarak atu halo koligasaun, maibe tenki hametin paz no estabilidade atu povu bele moris hakmatek no hala’o dezenvolvementu di’ak durante tinan 5 mai ne’e.
Samuel dehan, Sekretariu Geral PD, Mariano Asanami hasoru malu ho prezidente Partidu CNRT, Kay Rala Xanana Gusmão, hanesan dalan ida ne’ebe hahu hodi bele halo koligasaun ho partidu hodi forma, maibe diresaun Nasional sedauk iha desizaun.
“Ami iha tempo badak sei halo inkontru ho Diresaun Nasional atu bele deside hodi forma governu,ˮ tenik Samuel.
Nia dehan, PD ne’ebe mos involve aan iha governasaun Aliansa Maioria Parlamentar (AMP) durante tinan lima nia laran, iha partidu balu ne’ebe dada susesu AMP nia interese partidu nian iha kampana.
“Agora PD sei aprezenta kriteriu, se sira lakohi ami sei hare, tamba ami nia hakarak ne’e ema ne’ebe ba iha governu ne’e tenki mai husi partidu politiku atu iha komitmentu hodi servisu povu no rai ida ne’e. Tamba ita ba bolu ema independente mai ne’e la hatene problema povu nian,ˮ katak lideransa PD.
Sekretariu Geral Interinu dehan, PD sei iha hanoin antes tama ba iha koligasaun tenki iha komprimisiu hodi bele haree didi’ak desizaun ne’ebe presiza hadiak no iha balu ne’ebe kontinua.
Discussion about this post