Radio, online – Militantes no simpatizante foin sae partido FRETILIN husi Sub-Distrito Ossu, Distritu Viqueque kodena maka’as ba lalaok Deputado Antonio Cardoso hanesan ema oportunista, tamba inresponsavel no aktus politiko baratu.
Porta voz, Yohanes Calvin Nico liu husi preskonfrensia iha kampo Tuti Comoro foin lalais ne’e dehan katak, Deputado FRETILIN Antonio Cardoso ne’ebe hetan kadeira iha Parlamentu Nasional ba dala rua (2) ne’ebe agora dadaun halo kampaina lao hamutuk ho CNRT hanesan traidor no oportunista.
“Hodi ami mak Deputadu Antonio ba tur iha Parlamentu Nasional saida mak Deputadu sai fali traisaun ba ami nia votus. Tamba ne’e ami husu responsabilidade atu labele halo politika ne’ebe kria konfuzaun iha povo nia le’et hodi lorin nafatin FRETILIN nia naran ba bosok povo hodi buka diak,”Yohanes lamenta.
Tuir foin sae FRETILIN Ossu ne’e dehan, to’o agora FRETILIN ida deit ne’ebe mak lidera husi kamarada Lu Olo no Mari Alkatriri. Liu husi oportunidade ne’e foin sae ne’e husu ba joventude no inan-aman sira iha dia 1 de Julu mai vota ba FRETILIN numeru 12.
Jerasaun foun husi partido FRETILIN senti tristi ba ema Ossu oan hanesan Antonio Cardoso ne’ebe halo politika laiha moral no sai oportunista hakarak buka diak deit.
Iha biban ne’e juventude FRETILIN Ossu ne’e husu husu no fo hanoin ba partido CNRT, liliu ba maun bo’ot Xanana Gusmão no ba maluk sira seluk hotu iha estrutura partidu CNRT nian iha nivel nasional tun ba baze atu kuidadu ho em oprtunista sira hanesan Antonio Cardoso ne’ebe lori lian bosok hakbesik a-an ba CNRT atu buka diak.
Ikus liu foin sae maubere ne’e husu ba Deputadu Antonio Cardoso atu lalika lori povu Ossu nia naran hodi ba ninia intereses politika ne’ebe la los no la iha prinsipiu.
“Ami garante Deputadu Antonio cardoso la iha membrus iha ninia rain rasik, sub-distrito Ossu. La iha ema ne’ebe bele fiar ba nia,”Yohanes akresenta.
Discussion about this post