Radio, online – Prezidenti Republika, Taur Matan Ruak (TMR) liu husi loron mundial ba labarik sira iha dia 1 de Junhu husu ba inan-aman sira tau matan oan sira nia vida, atu nune’e iha loron ikus mai oan sira sei tau matan ba inan-aman sira mos.
Diskursu Prezidenti TMR ne’e iha ninia servisu fatin. Redasaun redioliberdadedili.com asesu komunikadau ne’e liu husi via email.
Prezidenti TMR hatutan, 1 de Junhu loron importante, loron ida espesial tebes, loron ida ba festa no loron ida ne’ebé labarik sira hotu iha fatin-fatin liuliu iha Timor-Leste simu prezente hosi família sira, hosi inan-aman, hosi profesores sira no hosi edukadores sira. Maibé ita la haluha mós iha loron ida ne’e labarik barak ne’ebé moris iha foho, ne’ebé toba iha rai, ki’ak, padese, ne’ebé la hetan eskola, ne’ebé inan-aman sira la iha kbi’it atu fó asisténsia ida dígna para ke sira nia moris mós hanesan labarik sira seluk ke iha diginidade no iha protesaun.
Ohin hanesan Prezidente da Repúblika ha’u husu ba inan-aman sira, husu ba edukadores sira, husu ba sosiedade tomak para ke halo esforsu boot ida fó protesaun, fó ajuda, fó atensaun ba ita nia labarik no ita nia oan sira. Sira mak futuru ita nia nasaun nian, sira mak esperansa ita nian, sira ke tempu ida la dook, tempu oinmai, sira mak sei tau matan fali ba ita, bainhira ita fila-an sai fali labarik, kuandu ferik no katuas ona.
Tanba ne’e tempu agora tau matan ba sira para ke loron-aban sira tau matan fali ba ita. Agora ita besik ba Eleisoens Parlamentares, hanesan iha fatin-fatin iha Timor laran tomak kuandu eleisoens la’o no hala’o kampanha, partisipasaun labarik sira barak loos.
“Husu ba polítiku sira, husu ba inan-aman sira para ke tau matan ba sira para ke sira labele diretamente ou indiretamente hetan rísku ne’ebé bele afeta ba sira nia vida no sira nia moris ohin no ba aban-bainrua,”TMR apela.
Ba labarik sira hotu; Parabéns ba imi hotu, Prezidente da Repúblika hein katak imi hotu estuda makaas liu tan, aprende para aban-bainrua, se mak hatene, imi ne’ebé ohin rona ha’u ko’alia ne’e bele sai fali Prezidente Timor karik.
Discussion about this post