Radio, online – Reprezentante Espesial Sekertaria Geral (RESG) ba Timor Leste ho misaun UNMIT, Ameerah Haq hakat ba Sekertaria Estadu ba Promosaun Igualdade (SEPI) hodi hato’o despedida wainhira ninia misaun atu remata iha TL.
“Honra no privileiju bo’ot ba ami, tamba ohin exelensia bele marka prezensa ba dala uluk no ikus liu mai ami nia eskritoriu,” dehan SEPI, Idelta Maria Rodrigues iha serimonia despedida Ameerah Haq ho funsionariu SEPI Kinta, (31/5) iha Palacio governu.
Sekertaria Estadu Idelta rekoinese katak, RESG mak reprezentante espesial feto premeira husi Sekertairu geral ONU nian mai TL. Fiar katak, ho RESG nia lideransa ne’ebe forte no partisipativu sei motiva feto foin sae sira TL atu bele asume kargu lideransa. RESG maneira ne’ebe simples ajuda tebes exelensia hodi estabelese relasaun diak ho governu TL.
“Hau ho hau nia funsionairu tomak sira rasik kontente tebes bele servisu ho SERG. Maske RESG nia pozisaun ne’ebe bo’ot. RESG sempre besik nafatin ba povu ki’ik sira,”Idelta akresenta.
SEPI apresia tebes apoiu UNMIT no ajensia ONU nian ne’ebe mak hato’o ona mai ami, partikularmente relasaun ho promosaun rezulusaun Konselhu Seguransa 1325 konaba feto dame no seguransa. Iha momentu ne’ebe RESG marka prezensa iha eventu SRSG open day iha Baucau no Suai. Objetivu husi eventu refere atu hato’o hanoin feto TL ba iha lideransa ONU sira.
SEPI sente katak, SEPI hetan sorte tamba hetan tekniku no finanseiru husi ajensia ONU hanesan Unidade jeneru UNMIT ne’ebe mak foin lalais lansa enkudramentu estratejiku kona-ba hakbi’it lideransa no partisipasaun feto iha eleisaun 2012.
UN Woman iha area xave konaba orsamentu sensivel ba jeneru, CEDAW, violensia bazeia ba jeneru, feto iha politika no rezulusaun konselhu seguransa ONU 1325, UNFPA iha violensia bazeia ba jeneru.
Liu husi oportunidade ida ne’e SEPI mensiona, planu asaun anual konaba violensia bazeia ba jeneru foin lalais ne’e aprova husi Konselhu Ministru tamba hetan servisu hamutuk ho ajensia ONU nian hanesan UNDP, UNICEF, UNPol, ILO no FAP no seluktan.
“Hau fo obrigadu ba ONU no espesial liu ba Sra Ameerah no tamba ho ninia misaun iha nasaun ne’e fo pasu positivu ba feto hodi hakat ba oin hanesan lideransa,”dehan Idelta.
Idelta mos dehan, liu husi dada lia Sra Ameerah ho knar foin sei esforsu hodi influensia ONU atu fo oportunidade ba feto sira iha PNTL no F-FDTL atu partisipa mos iha misaun pas nian iha nasaun sira mak ONU prezensa ba.
“Ida ne’e importante tebes, hau espera ne’e laos promete ida maibe bele sai realidade iha aban-bainrua,”Idelta dehan ho esperansa.
Liu husi palestra ho funsionariu SEPI nian, RESG Ameerah elujia tebes ba servisu durante SEPI halo hodi hasa’e feto nia kbi’it. Ameerah husu atu SEPI presiza haka’as no servisu nafatin hodi atende nesesidades feto nian.
RESG kongratula ba governu tomak no espesial ba SEPI ne’ebe tau matan espesial ba feto nia vida iha ekonomia, kultura, edukasaun, sosial, politika no sira sel-seluktan.
“Hau mai iha ne’e hanesan ikus liu hasoru malu ho kolega sira mak servisu iha SEPI hau fiar katak, ho SEPI nia esforsu nasaun TL sei diak liutan ba dezenvolvimentu ne’ebe garante igualdade,”dehan Ameerah hodi taka.
Prezensa SERG Ameerah Haq iha TL ho misaun UNMIT hodi troka Khamalesh Sarma, iha 2007. SERG Ameerah sei fila ba ONU iha Nova Iorke iha dia 9 de Junu 2012.
Discussion about this post