Radio, online – Partidus Politikus (parpol) ne’ebe hetan asentu iha Parlamentu Nasional (PN) mak bele simu subsidiu subvensaun governu nian ba eleisaun legislativa, tanba lei ne’ebe iha 2008 garantia ba asentu parlamentu, kestaun ne’e hato’o hosi Deputadu Bankada CNRT Aderito Hugo, quinta feira (26/04) iha Uma Fukun, Parlamentu Nasional.
“Partidu ne’ebe hetan asentu iha Parlamentu Nasional mak hetan subsidiu husi governu. Partido ne’ebe laiha asentu iha parlamentu sei la hetan subsidiu hodi halo kampaina eleitoral,” Aderito informa.
Nia reforsa katak partidu ne’ebe laiha asentu parlamentu sira registu iha Tribunal Rekursu maibe sira la iha direitu atu hetan subsidiu.
Tuir eis Diretor Timor Post ne’e, iha eleisaun geral 2012, liliu eleisaun lejislativu ne’e, karik partidu sira ne’e hetan asentu parlamentu mak sira foin bele hetan subsidiu husi governu iha periodu tuir mai.
Nia lamenta katak orsamentu 2012 ba Subsidiu iha eleisaun parlamentu ninian, la preve ba partidu politiku sira ne’ebe atu kompete iha eleisaun parlamentar
Nia reafirma katak, subsidiu ne’ebe ba iha eleisaun prezidensial ba kandidatu iha primeira ronde ne’e subsidiu halo hosi dekretu iha governu tanba nesesidade kandidatura ne’ebe avansa hanesan kandidatu Independente, kandidatu hosi partidu
Iha fatin hanesan Deputadu Bankada FRETILIN , Inacio Moreira informa katak, orsamentu 2012 la preve ba orsamentu subsidiu ba partidu ne’ebe mak atu partisipa.
“Ema ida-ida hakarak forma partidu politiku importante liu mak tenke kria kondisaun finanseiru” Inacio rekomenda.
Inacio reforsa, partidu politiku tenki prepara an ninia orsamentu rasik hodi organiza an didiak atu bele konkere iha eleisaun legislativa .
“Petisaun fo marjen ba ema hotu-hotu ne’ebe iha posibilidade harii partido atu bele konkore iha eleisaun legislative,” Inacio komenta.
Discussion about this post