Radio, online – Komandante Falintil- Forsa Defeza Timor-Leste(F-FDTL), Maijor Generál Lere Anan Timor, lamenta ho nia fotografia ne’ebé apoiante balun kandidatu PR Francisco Guterres Lu-Olo uza hodi halo kampaña polítika.
“Sira balu la hatene uza demokrasia. Hahalok husi apoiante Lu-Olo balun hatudu apoiante ne’e laiha moral, uza fali hau nia fotografia ba halo manipulasaun,”Lamenta Lere ba jornalista Kinta, (12/4).
Iha fotografia ne’ebe lori hodi halo kampaina ne’e Lere hamrik hamutuk ho kandidatu PR husi FRETILIN Fracisco Guterres Lu-Olo ho mos Prezidenti Republika aktual Jose Ramos Horta iha serimonia simu medalia meritus, fulan hirak liuba.
Komandante F-FDTL ne’e dehan, tuir informasaun ne’ebé nia parte hetan katak, ema uza fotografia ne’e hodi lohi eleitór sira katak atual PR Ramos Horta entrega ona poder president ba Lu-Olo ho M aijen Lere mak sai testamuña.
“Ida ne’e loos. Ha’u hato’o ona keixa ba STAE atu hola medida. Se STAE la prosesa ha’usei lori fali STAE ba Tribunál,” deklara nia, horisehik.
General fitun rua ne’e rekoñese, nia hasai duni fotografia ho Lu-Olo, maybe ida ne’e fotografia kleur nian, wainhira Lu-Olo simu medailla rekoñesiementu husi PR Horta.
Kazu ne’e, Lere konsidera hanesan lia bosok ne’ebé hafoer no prejudika nia dignidade nu’udar komandante F-FDTL.
Lere dehan, ema iha direitu atu halo kampaña, maibe labele hanoin de’it katak utiliza kualker meius hodi alkansa sira nia objektivu.
Discussion about this post