Radio, online – Kandidatu Prezidensial (Kaprez) Francisco Guterres ‘Lu-Olo’ ho Taur Matan Ruak (TMR) hasoru Prezidenti da Republika Jose Ramos Horta hodi garante estabilidade no hakribi aktu violensia mak mosu durante kampaina iha eleisaun II ronda.
Kaprez nain rua ne’e hasoru malu PR Horta ho oras diferente iha loron Kuarta, (28/3). Kaprez ‘Lu-Olo’ ba jornalista hodi husu ba nia militante no povo atu lalika hatauk malu iha elisaun ba II ronda.
Tuir ajenda ohin, Kinta (29/3) iha Palasio Prezidenti da Republika sei iha reuniaun konselu superior ba defeza no seguransa. Tuir Lu-Olo iha reuniaun nee hanesan oportunidade diak hamutuk ho PNTL no F-FDTL atu rona seguransa rai laran.
“Karik iha reuniaun ne’e fo aportunidade ba hau, atu koalia. Hau seidauk bele kolia saida mak hau atu kulia iha reniaun ne’e,”Lu-Olo esplika.
Antes ne’e Kaprez TMR ba jornalista dehan iha eleisaun II ronda ne’e husu povu tomak atu labele halo intimidasaun ba malu no sunu uma hodi hakanek malu.
“Hau bain -bain halimar, uluk iha tempu Indonezia lori kainau mai ita la tauk, Matan Rauk hatais farda halo timor oan tauk fali, ne’e lojika oinsa los. Farda hau tau ne’e mai husi povu ran ho ruin mak iha nia laten, ne’ebe farda ne’e sagradu tebes,”dehan Taur.
Kapres TMR dehan iha nia parte iha kontrolu ba apoiante no simpatizantes sira para sivilismu tenke maka’as, tamba TL prezia dame no paz mak Timor bele lao ba oin.
“Hau fo parabens ba povo maske ho udan no anin bo’t partisipa nafatin ba eleisaun ho diak ne’ebe hau konteti los,”Taur agradese.
Iha fatin hanesan PR Jose Ramos Horta hataten katak, ohin, Kaprez Lu OLo ho TMR diretamente rona briefing husi STAE, CNE, PNTL ho F-FDTL konaba situasaun jeral ba eleisaun II ronda nian.
“Hau husu ba povu tomak atu lalika ameasa malu. Rai odiu vingansa ne’ebe atu hamonu ita nia oin iha mundu Internasional,”Horta apela.
Discussion about this post