Radio, online – Maske eleisaun Prezidensial seidauk remata Kandidatu Jose Ramos Horta ho Fernando La Sama halo ona aliansa politika hodi hasoru iha eleisaun parlamentar iha fulan Juinu oin mai.
Deklarasaun aliansa ne’e halao iha Otel Timor Kuarta, (21/3). “Iha kampaina hau ba hamutuk ho PD maibe hau nudar ema individu ne’ebe la tama iha strutura PD nian. Hau ho PD nia aliansa ne’e ba iha eleisaun parlamentar,”dehan Horta.
Husu konaba iha eleisaun segundu volta ne’ebe Lu-OLo ho Taur Matan Ruak, Ramos Horta dehan agora dadaun seidauk fo sira nia pozisaun atu apoiu ba kandidatu nain rua ne’e, tamba sei estuda no hare evolusaun politika iha rai laran.
Fatin hanesan Fernando La Sama hatete, komprimiu aliansa halo Ramos Horta hare ba liu iha eleisaun parlamentar. Konaba fo apoiu ba kandidatu Lu-OLo ho Taur Matan Rauk, La Sama seidauk hanoin to’o ba iha ne’eba tamba apuramentu nasional seidauk remata no kalendariu ba eleisaun segundu ronda seidauk fiksu.
Tuir La Sama iha pozisaun tolu mak sei foti husi dirasaun PD nian katak bele fo apoiu ba kandidatu Lu-Olo, bele fo apoiu ba kandidatu Taur Matan Ruak nomos bele fo livre ba militantes PD atu vota tuir sira nia konsensia.
“Hau seidauk bele foti desiaun atu fo apoiu ba kandidatu nain rua ne’ebe hakat ba eleisaun prezidensial, tamba iha PD laran sei halo diskusaun klean,”La Sama deklara.
Discussion about this post