Radio, online – Movimentu Estudante Universitariu Juventude Distritu Lautem ( MEUJ-DL) kontra total politika Ministerio Edukasaun no UNESCO atu implementa lian materna ba prosesu aprendizazen iha nivel ensino baziku no sekundario iha Distritu Lautem.
Porta voz MEUJ-DL Mario Kabitana Soares liu husi konferensia da imprensa iha eis UNTL Kaikoli, Segunda (23/1) hateten katak, implementa lian materna konsidera hanesan haburas rasismu no sukuismu iha Timor-Leste no afeta maka’as ba Unidade Nasional.
“Ami husu ba Ministerio Edukasaun no Kultura atu hapara politika implentasaun lian maternal iha prosesu apredizazen tamba politika ne’e hanesan “Divide Et Impera”. Ami husu mos ba PN halo lalais lei organiku ba linguistik nian hodi nune’e bele regulariza lian nasional no lian maternal,”Mario akresenta.
Iha biban ne’e MEUJ-DL husu ba Komisaun F iha PN presiza konsedera katak, wainhira implentasaun ba programa lian materna atu hanorin iha eskola sei afeita maka’as ba estudante sira difisil hatene lian Tetum.
Efrem Viegas, estudante husi Distritu Lautem dehan, iha Lautem iha lian 3 mak hanesan Fataluku, Makasae no Makalero. Estudante Lautem iha 95 % seidauk bele koalia lian Tetum. Ho razaun ne’e iha lian bar-barak ne’ebe la hanesan estadu ne’ebe hakerek ona iha konstituisaun RDTL dehan lian Tetum sai lian Nasional ne’ebe hametin Unidade Nasional.
“Wainhira Ministeriu Edukasaun implementa nafatin lian materna, ami sei mobiliza estudante, oraganizasaun juventude no komunidade hodi halo asaun pasifika hodi kontra total politika rasista ne’e,” Efrem lamenta.
Lian materna atu hanorin iha eskola primari ho sekundaria tamba hetan orientasaun husi Diretora geral Fundasaun Alola, Kirsty Gusmao.
Discussion about this post