Radio, online – Funsionariu hamutuk 48 mai husi Ministeiru oioin simu sertifikat kona ba treinu no avaliasaun ba Funsionariu Publiku. Kursu ne’e oferese husi Sentru Treinamentu Vokasional Juventude ho lian Tetun husi formador Timor oan nain tolu (3) ne’ebe hetan ona kualifikasaun no fiar husi Sinburne University Of Tecnology,Melbourne,Australia. Kursu ne’e, halao durante loron rua nolu.
Serimonia entrega sertifikadu ne’e Tersa, (13/9) iha Otel Timor, Dili. Xefi Programa AuSAID Vincent Ashcroft hateten, Publik Sector Capacity Development Programa (PSCDP), hanesan programa ida ne’ebe governu Australia finansia hodi sai patrosinador ba kursu IV.
Tuir Ashcroft , sertifikadu kona ba treinu no avaliasaun ba Funsionario Publiku sira husi Ministeriu Oi-oin ho oObjetivu atu prepara grupu formadores ne’ebe professional no kualifidade hodi bele suporta no halao programa treinamentu ba governu tomak. Treinu no avaliasaun ne’e kobre kompetensia ne’ebe nesesariu tebes ba partisipantes sira hodi halao formasaun iha area servisu oi-oin no atu halao avaliasaun bazeia ba kompetensia iha kontestu barak.
Dehan, Ashcroft Australia mak doador bilateral bo’ot liu ba TL no fo ona apoiu ba programa iha setor oioin hanesan Saude, oportunidade servisu ba foin sae, Justica,Jestaun finansas Publiku programa, be’e mos no saneamentu ba iha area rurais no mos dezenvolvimentu setor publiku
Nia salienta liu tan, dezenvolvimentu kapasidade maka objetivu prinsipal ida husi programa AusAID, ne’ebe fo ona formasaun ba funsionariu publiku nain 10.00o resin nomos fo ona bolus estudu ba ema nain 270 resin.
“Austaria iha mos komitmentu hodi apoiu Planu Estrategiku Dezenvolvimentu Timor Leste Nian,”dehan Ashcroft .
Iha fatin hanesan Sekretariu Estado Reforma Administrativa, Florindo Pereira ba Jornalista dehan, “Ita nia nasaun timor leste presisa treinamentu ,matenek no mos presisa treinadores Timor oan rasik,”.
Florindo Pereira realsa, treinamentu ne’e sei kontinua nafatin ba oin no funsionariu publiku sira ne’ebe simu sertifikat ne’e fila ba sira nia ministeriu ida-idak sira mos bele halo assesment ba instituisaun sira nian antes sira halo treinamentu .
Entertantu Anacletu Pinto husi Gabineti Prezidente Republika, ne’ebe simu sertifikat sente kontente tebes tuir treinamentu ne’e, tanba bele aumenta nia kapasidade servisu. Anacletu konfesa, ba nia servisu fatin sei aplika fali materia ne’e nia hetan durante tuir teinamentu ne’e.
“Ita presiza nafatin hetan ajuda husi maluk sira mak iha esperensia maximu hodi hanorin ita nia maluk Timor oan atu nune’e ema hotu-hotu bele hola parte ba prosesu dezenvolvimentu nasional,” Anacletu espera.
Discussion about this post