UNTL Lansa Livru Movimentu Petisionariu ba Krizi 2006 – 2008

Radio, online –  Universidade Nasional Timor Lorosa’e liu husi Peace and Conflict Studies Centre (PCSC) servisu hamutuk ho Centru Nasional Investigasaun Ciensitifiko (CNIC) lansamentu livru konaba istoria movimentu petisionariu ba krizi 2006 – 2008.

Rezultadu husi peskiza ne’e imprime ona ba iha livru ho titlu istoria movimentu petisionariu iha kriji 2006 – 2008 ne’ebe lansa iha 12 Setembru foin lalais ne’e, salaun auditorium  Liceu UNTL.

Ko’ordenador Unidade Peskiza Natalino de Jesus Gusmao Soares hateten, objetivu husi lansamentu ne’e hodi sai ba publiku ka instituisaun relevante nune’e bele asesu ba livru refere.

Autor livru ne’e hatutan, livru ne’e konklui kapitlu 7 ne’ebe iha kapitlu permeiru hakerek kona ba tamba saida hakarak kria livru ne’e. iha kapitlu balun hakerek konaba istoria FALINTIL ka F-FDTL, kauza konflitu internal FALINTIL ka F-FDTL no prosesu tomak konaba mosu petisionairu ne’ebe lidera husi eis Tanente Gastao Salsinha. Iha livru ne’e mos hakerek konaba Major Alfredo Reinaldo ho nia elementus halai sai husi Komando F-FDTL.

Prosesu hakerek livru ne’e kuaze lao tinan ida, inklui prosesu edisaun no tradusaun. Livru ne’e mos hakerek iha lian Tetun.

Suporta finanseiru ba hakarek livru ne’e PCSC hetan suporta husi governu Irlandia, Dartementu rezolusaun konflitu, liu husi Trocer Timo Leste. Orsamentu ba livru ne’e ho montante US$ 2000,00.

Iha fatin hanesan Reitor UNTL Aurelio Guterres hateten, PCSC laos hein deit tinan liman mak lansa livru, maibe bele karik halo peskiza publiku nune’e hodi dezenvolve problemas iha rai laran.

“Ita tenki badinas hakerek ba situasaun sosial nian, atu nune’e ita muda kultura husi konta istoria iiha ibun hodi tau iha livru ida,”Reitor ne’e sadik estudante sira.

Reprezentante Governu Sekertariu Estadu Defeza Julio Thomas Pinto hanesan ema ne’ebe analizador no halo livru barak ona iha oportunidade ne’e fo parabens ba estudante sira haka’as hodi hakerek istoria krizi 2006 iha livru ida. Ne’e hanesan matadalan ida ba iha futuru atu hateke ba oin ho pasu diak liutan.

“Ita Timor ne’e tur tesi lia husi dader to’o dader fali mos la hotu maibe atu foti lapizeira hakerek iha surat tahan ida susar tebes. Ho peskiza ne’e fanun estudante sira atu badinas hakerek,”nia apela.