Radio, online – Aliansa Nasional Timor Leste ba Tribunal Internasional (ANTI) la satisfas ba Tribunal Distritu Dili (TDD) liu husi prosesu julgamentu hodi hamonu sentesa ba suspeitu milisia Besi Merah Putih (BMP) husi Distritu Liquisa, Valentim Lavio tama kadeia tinan 9 , maibe suspeitu ate agora livre hela iha liur no goza ninia direitu hanesan ema babain iha Liquisa.
Kestaun ne’e hato’o husi Ko’ordenador ANTI Sisto dos Santos liu husi konferensia iha sede Assosiasaun HAK Kuarta, Farol Dili, (14/9).
Sisto hatutan, iha loron 08 de jullu 2011, Tribunal Distritu Dili foti desizaun final ba kazu krime grave ho No.13/C.Ord/2011. Kazu ne’e, krime kontra umanidade ne’ebe involve kondenadu Valentim Lavio hanesan Membru Milisia Besi Merah Putih (BMP) hasoru vitima Patricio Sarmentu Viegas iha loron 06 Setembru 1999.
Julgamentu ba kazu krimi ne’e hahu iha fim de fulan Maiu. Diriji husi Juizes kolektivu ne’ebe kompostu husi Juiz internasional, Juiz Nasional, Ministeriu Publiku no Prokurador Internasioal. Maibe to’o ohin loron Suspeitu Valentim Lavio Livre iha Liur .
Sisto reafirma, maske tribunal primeiru instansia hamonu ona sentensa ba tinan 9 iha kadeia ba konenadu Valentim Lavio iha loron 08 Jullu 2011, maibe ate ohin loron (kuaze loron tolu ) prosesu ba kazu ne’e seidauk iha ninia finalidade, tamba sidauk iha ezekusaun ba dezisaun final tribunal ninian ho razaun ne’ebe mak la razoavel tanba juiz ne’ebe dirije kazu ne’e sidauk fo notifikasaun eskrita ba intresadu sira,tantu Vitima tamba ne’e Valentim Lavio kontinua livre iha liur.
“Ami ANTI prekupa no lamenta tebes katak juiz internasional sira la servisu ho provisional no kaer sira nia papel ho responsabilidade hodi la konsege formula akordaun julgamentu ba dezisaun Ekrita ne’e tenki han tempu kuaze fulan tolu nia laran,”Sisto lamenta
Alende ne’e mos, ANTI prekupa tebes ho arquidu ne’ebe sei livre hela bele halai ba estrangeiru ka Indonesia tamba depois Juiz anunsia dezisaun oral la inklui medida koasaun ruma la’o tuir akordaun juiz nian
Atu taka ANTI hato’o deklarasaun hodi ejiji ba instituisaun relevantes hanesan Juiz kolectivu liliu ba juiz Presidente, Dr.Joao Felgar, Juiz Internasional ne’ebe preside julamentu ba kazu krime kontra umanidade Milisia BMP Valentim Lavio atu fo prioridade no konsentrasaun ba kazu ne’ebe nia preside hodi hatun lalais notifikasaun final.
Discussion about this post