Radio, online – Organizasaun ba Direitus Humanus no Justisa Assosiasaun HAK la satisfas ho atuasaun Polisia Nasional Timor Leste (PNTL) ba kazu ruma sempre tarde. Ho atuasaun tarde ne’e hodi hamosu problema sempre naruk ba bebeik.
Kestaun ne’e hato’o husi Diretor Ezekutivu Assosiasaun HAK Rogerio Viegas liu husi konferensia da emprensa Kuarta, (7/9) iha Farol, Dili.
Rogerio hatutan, atuasaun PNTL ba situasaun tuir duni lei no valores direitus humanus. Maibe problema mak atuasaun ne’e sempre tarde liu.
Hanesan kazu Galitas nian, depois mosu grupo ida oho membru PNTL ida mate, kalan ne’e polisia mai foti mate isin, maibe la monta seguransa. Ho nune’e iha kalan ne’e kedan ema grupo balu aproveita aliha seguransa sunu hotu uma iha Galitas.
“Ita hare PNTL ne’e todan hanesan lenuk hodi atua ba situasaun ruma. Hau hare iha PNTL laiha analiza ba kazu ruma ne’ebe atu mosu situasaun sai bo’ot liutan,” Rogerio lamenta.
HAK hanesan organizasaun ne’ebe servisu ba direitus humanus senti prekupadu tebes ba situasaun seguransa iha Distrito Covalima. Baucau no Manufahi. Liliu direitu populasaun atu moris hakmatek.
HAK nia observasaun ba situasaun ne’ebe sai konflitu iha fulan Agostu nia laran, Rogerio fo sai katak, konflito iha Sub-Distrito Zumalai hatudu katak,ejisti duni grupu PSHT nomos KORKA ne’ebe invidualmente komete duni aktu krimi hodi rezulta membru polisia ida mate.
Iha Sub-Distrito Baucau Vila hatudu katak, konfrontasaun entre arte marsias PSHT no Kera Sakti. Konfrontasaun ne’e bebeik ona, hahu kedas husi Fevereiru 2010, dada mai to’o fulan Agostu ne’ebe resulta motor 1 hetan sunu, uma 2 hetan sunu inklui kios ida estragus.
Husi observasaun HAK ba situasaun polisia kona ba asaun greve iha Sub-Distrito Same Suku Betanu hatudu katak, populasaun halo asaun greve kontra kompanha Tinolina no mos governu ho rasaun tamba husi parte governu nian seidauk fo kompensasaun ba rai hektares 12.
Tuir resultadu monitorizasaun HAK nia hatudu katak,durante greve la iha indikasaun ruma ne’ebe hatudu katak populasaun Betanu halo aktu krimi nomos laiha violasaun husi polisia ba protestu sira
HAK husu ba Ministeriu Justisa tenki foti medidas ne’ebe adekuadu hodi halo prosesu indentifikasaun ba rai populasaun nian hamutuk hektares 12 iha Suku Betanu, hodi nune’e bele garantia prosesu kompesasaun ne’ebe justu ba povo nia direito.
Discussion about this post