Radio, online – Foin lalais ne’e liu husi plenaria Deputadu husi bankada PSD Augostu Tara kondena gropu Conselho Popular Defeza-Republika Demokratika Timor Leste (CPD-RDTL) halo kobransa ilegal ba povu iha Distritu Oecusse.
Responde ba asuntu kondenasaun ne’e Ko’ordenador jeral CPD-RDTL Antonio Aitahan Matak la simu no lamenta tebes ba informasaun husi Tara tanba halo defamasuan ba grupo CPD-RDTL.
Aitahan Matak nudar ema veteranus hamutuk ho nia grupo sei lori Deputadu Tara ba Tribunal, tamba informasaun nebe’e fo sai ba publiku dehan Antonio Aitahan matak simu osan husi Trasizio da Costa ne’ebe durante ne’e halao kobaransa ilegal ba povu sira.
“Hau no hau nia grupo sei lori kazu ne’e ba Tribunal, tamba Tara hamutuk ho Joao Tabeis halo defamasaun mai hau no defama naran veteranus,”Aitahan Matak kometa.
Hatan ba kestaun ne’e Deputadu Tara prontu atu Aitahan Matan lori ba tribunal. Tara iha evidensia iha kasete rua ne’ebe mak halo gravasaun husi povu komunidade sira nia lian konaba CPD-RDTL halo kobaransa ilegal ba povu sira. Iha kasete laran ne’e koalia ho lian materna Baikenu, ne’ebe dehan ilegal ne’e halao iha sub-distritu ha’at.
“See Antoni Aitahan Matak la fiar hau sei telefone ba Oecusse atu lori kaset rua ne’e hodi intrega ba governu no lori ba Tribunal,”Tara konfesa.
Tuir Tara lolos ne’e nia lori kasete rua ne’e, maibe tanba iha lina Baikenu ne’ebe sei sei halo tradusaun tuir orijinal.
Agora dadaun, Tara sadik ba grupo CPD-RDTL ho Antonio Aitahan Matak lori kazu ne’e ba tribunal atu hetan justifikasuan lolos. Iha tribunal mak sei hatene see mak los no see mak sala.
“Hau nia plano sei halibur dadus ba kobransa ilegal nebe’e mosu. See dehan hau bosok. Kobransa ilegal ne’e krimi, tribunal tenki julga ba ema sira malu husu nafatin osan ba povu, tanba agora laos tempu iha resistensia,”sadik Tara.
Discussion about this post