Radio, online – Prezidenti Republika Jose Ramos Horta rekoinese ba problemas rai sai hanesan obstaklu ba governu hodi hari uma ba kbi’it laek sira. Tuir programa governu sei hari uma 5 kada aldeia, sei hetan uma ho total 111.25 husi aldeia 2225 iha teritoriu romak.
Hari uma hanesan programa hamenus kiak. Governu aloka orsamentu Dollares Americanu Juta Rihun Sanulu Resin Ida ($.11.000.000).
Lia hirak fo sai husi Prezidenti Republika, Jose Ramos Horta, liu husi programa ETCAS apoiu orsamentu ba ONG Nasional no Internasional 25 iha Timor Leste, iha Salasaun Konferensia Prezidenti Nicolau Lobatu – Aitarak Laran, Kuarta (22/06/2011) foin lalais ne’e.
Horta hatutan, maske governu aloka orsamentu bo’ot hodi harii uma lima iha kada aldeia hodi apoiu ba ema kiak sira iha teritoriu, maibe governu sei infrenta problema ho rai, tanba komunidade sira la fo rai ne’ebe kondusivu atu governu harii uma hirak ne’e.
“Programa governu nian ne’e diak no fo benifisiu ba ema kiak sira, hakarak la kohi tenki implementa duni, hodi tulun feto faluk no kiak (kbiit laek) sira, atu bele moris ho dignidade iha pais ida ne’e,”Horta espresa.
Horta hatutan, programa ajuda ema kbiit laek sira, iha Xefei Estadu nia programa iha tinan kotuk harii ona uma atus ida resin (100+), hodi ajuda ba feto faluk no kiak sira, no tinan ida ne’e labele kontinua, tanba governu mos halo programa ne’e.
Horta fo dalan ba governu katak, esprensia halao uma ba ema kbiit laek sira, premeiru tenki halo uluk aprosimasaun no dialogo ho komunidade no autoridade lokal sira, hafoin husu ba autoridade lokal sira aprezenta lista ema kbiit laek sira nian.
Konstrusaun ba uma halao rasik husi komunidade no jovem sira iha suku no Aldeia. Kada uma gasta deit tempu fulan ida, uma hirak ne’e remata no intrega ona ba benifisiariu sira hodi uza.
Ema numeru Un iha nasaun ne’e apela ba governu programa hari uma labele fo ba kompanha privadu sira, tuir Horta programa sei la lao. Uma ida gasta deit osan Dollar Americano Rihun Ha’at – Rihun Lima ($4.000.00 – 5.000.00), no kompania sira sei lahetan lukru husi projetu ida ne’e, karik hetan lukru mak uma sei laiha kualidade.
“Diak liu osan ne’e fo ba komunidade sira mak ko’ordena malu hodi halo uma. Hanesan hau nia programa ne’e. dalan ne’e sei fo benefisiu ba komunidade sira iha sira ididak nia aldeia,”Horta rekomenda.
Discussion about this post