Radio, online – Iha fulan Juñu agora Komisaun Funsionáriu Públiku (KPF) sei fo pensaun ba funsionáriu públiku hamutuk 2220, tamba idade liu ona tinan 60.
Tuir lei, pensaun ne’e sei fo funsionáriu ne’ebé sei ativu liu ona idade 60, funsionáriu ne’ebé kondisaun saude la permite ona hodi hala’o servisu, no funisonáriu ne’ebé mate tiha ona.
Prezidenti KPF, Libório Pereira dehan, pensaun ba funsionáriu hetan ona aprovasaun husi Parlamentu Nasionál, no sei públika iha jornál da Repúblika.
“Pensaun ba funsionáriu ne’e aprova no promulgadu ona, iha fulan Juñu tenki implementa ona, molok atu implementa tenki aprova uluk lai dekretu lei ida husi governu oinsa atu tau regra implementasaun ne’e,” dehan Libório ba jornalista iha salaun inkontru MNE, kuarta horiseik.
Ho ida ne’e, Libório apela ba Diretór Jerál iha Ministériu hotu-hotu atu hahú identifika sira nia funsionáriu sira ne’ebé idade liu ona tinan 60 tenki hetan ona reforma hodi hetan pensaun husi governu tuir lei. Funsionáriu Públiku Timór-Leste hamutuk rihun 31 liu, inklui mós F-FDTL ho PNTL.
“Ha’u fó hanoin tiha ona ba Director sira atu bele haree sira nia funsionáriu hirak mak idade 60 ona ba leten no faluk oan ki’ak hira no funsionáriu hira mak aleizadu la tama servisu inklui mós funsionáriu ne’ebé mate ona,” nia hateten.
Tuir regras atu hetan pensaun ne’ebé aplika ba norma husi saláriu funsionáriu nian ne’ebé mak iha 75% ba sira ne’ebé aleza no labele servisu ona sei hetan pensaun 100%.
“Ida ne’e regras jerál pensaun ba funsionáriu sira, ne’ebé mak durante ne’e servisu hela iha administrasaun estadu ninian,” nia informa.
Discussion about this post