Vota Tuir Geografia Reseseamentu Eleitoral

Radio, online – Parlamentu  Nasionál (PN) la konsege  altera lei  eleitorál  artigu  40 tamba quorum  la  to’o  (numeru  deputadu  la  atinje  maioria). Tamba  ne’e, eleitór  sira  kontinua  ba  vota  tuir ida-idak  nia geografia reseseamentu eleitoral, iha  eleisaun  II ronda.

“Iha  informasaun  ne’ebé  maka  sai  ba públiku katak, lei  eleitorál  ne’ebé  Governu  Xanana  prepara  hateten  dehan  ema  ida-idak tenki ba  vota  iha ida  nia  suku tuir unidade geográfika. Saida  maka  akontese, esperiénsia  primeira  ronda  ne’e  hatudu  difikuldade  barak  tiha  ona  tamba  populasaun  laiha  kondisoens  para  ba vota. Ami  nia  preokupasaun  maka  Governu  tenki  toma  responsabilidade,” Deputadu  Bankada  Fretilin, Inacio  Moreira  iha Parlamentu  Nasionál, Tersa(10/04).

Relasaun   ho ba vota tuir geografia reseseamentu eleitoral, Parlamentu  Nasional aprova  de’it rezolusaun  ida  hodi rekomenda  ba  órgaun  eleitorál  no  governu  atu  prepara  de’it  kondisaun (transporte) atu  fasilita sira  ba  vota.

Iha fatin  hanesan, Deputadu Bankada Fretilin Josefa Pereira hato’o mós prekupasaun ne’ebé hanesan. Tuir  nia katak,  karik  governu foti duni medidas  ne’ebé maka  autorizasaun  husi  Parlamentu  atu  fasilita  transporte, ida ne’e mós defisil oituan  tamba ne’e bele  hamosu duni polítika  osan(money politic).

“Ha’u  atu hateten  de’it  katak  susar  tebes  governu  atu  konsidera  karta  ida  ne’ebé maka  president e  Parlamentu  haruka ba  governu  atu  prepara  transportes,” nia dehan.
Nia  haktuir, iha  eleisaun  primeira  ronda, ninia partidu fasilita  ba sira nia militantes  ba vota  iha  suku, maibe  sei  iha  komentáriu katak ne’e  asaun  money politic

“Ha’u  atu hateten de’it katak, iha eleisaun  primeira  ronda, ami nia partidu fasilita ami nia militante  sira  ba  vota  iha ida-idak nia suku. Maibé, iha mós komentáriu katak ida ne’e hanesan money politic. Maibé, ida sorte boot ona, tanba tuir loloos ne’e governu  nia servisu. Tamba governu laiha pozisaun ida ne’ebé mak  firmi  atu haree ba buat ida ne’e, entaun partidu rasik hola desizaun atu fasilita nia militantes,”Josefa akresenta.

Iha foin lalais ne’e, Vise Prezidente PN Maria Paixão hateten tempu la biban ona atu altera lei eleitorál, oras ne’e, tuir Maria hanoin,  ema hotu bá halo kampaña, tan ne’e, susar tebes atu mai priénse quorum. Maibe, Paixão tenik, sira sei bele altera ba eleisaun Parlamentár.