Radio, online – Deputadu husi bankada opozisaun iha Uma Fukun Parlamentu Nasional (PN) husu ba governu atu intervein folin mina ne’ebe komesa sae maka’as.
Deputadu, Francisco Miranda Branco, iha plenaria PN, segunda (02/04) hateten, wainhira Governu la halo intervensaun maka konsikuensei sei daet ba folin sasan iha merkadu iha Timor Leste.
“Ita hotu hatene katak iha merkadu mundia folin mina hetan aumenta ne’ebe nia implikasaun afeta ba ita hotu. Maibe atu responde ba situasaun ida ne’e , so Governu maka bele responde ho nia politika halo nusa mak bele halo intervensaun hodi labele afeta ba presu transporte publiku, no afeta mos ba folin sasan iha merkadu,” hateten Branco.
Tanba ne’e, nia hatutan, atu labele fo todan ba konsumidor sira Governu presija tebes halo intervensaun.
Branco hatutan, folin mina ne’ebe sa’e sei fo mos impaktu ba estudante sira, tanba realidade hatudu dadauk ona iha kapital Dili, mikrolet sira komesa hapara sira nia operasaun, tanba pasajeirus kontinua selu hanesan baibain.
Tuir observasaun iha tereinu, durante semana hikus ne’e haktuir folin mina iha rai laran komesa sa’e, no afeta dadauk ona ba transporte publiku sira, Mikrolet, Taxi sira komesa hasae ona folin ba pasajeirus.
Discussion about this post