Dili_26/09/2024– Asosiasaun Jornalista Timor-Leste-AJTL ho United Nations Population Fund (UNFPA) Timor-Leste akordu hodi servisu hamutuk ho objetivu atu hasa’e kuñesementu Jornalista sira ne’ebé hamahan aan iha AJTL liuliu iha area saúde ne’ebé ligadu ho UNFPA nia servisu durante ne’e.
Akordu servisu ne’e primeiru haree ba saúde seksuál reprodutiva, saúde materna, planeamentu familiar no HIV SIDA, nomós moras hadaet husi relasaun sexual, segundu haree liuba servisu saida mak UNFPA halo ba adolsente juventude nian ne’ebé fó treinamentu ba joven sira kona-ba relasaun saudavel ne’ebé mak ami servisu hamutuk ho Ministerio Juventude Desportu no Arte Kultura nomós Ministerio Edukasaun, treceiro mak Igualidade Jéneru no Empoderamentu Feto no ikus mak haree liuba area populasaun nian ne’ebé halo sensus hamutuk ho estatiska nasional hanesan sensus estudu demografiku saúde nian”.
Dircio Francisco Xavier Fátima Ximenes nu’udar jerente programa haktuir asuntu bazeia ba jeneru hanesan violasaun direitu umanu tanba ne’e esensial tebes hodi jornalista sira atu bele iha kuñesementu baziku kona-ba saida mak Violensia Bajeia ba Jeneru depois hatene kona-ba tipu violensia sira nomós oinsá nia impaktu iha saúde depois nia kauza sira.
“Tanba ita hatene katak media hanesan papel importante hodi fó informasaun lolos ba komunidade, nune’e bele halo notisia sira ho lolos no di’ak kona-ba VBJ aumesmu tenpu bele kontribui redusaun no diminuisaun ba violensia ne’e iha Timor-Leste” Hateten Nia iha Salaun Hak Farol Quinta Feria, 26/09.
iha parte seluk mak bele eduka mós komunidade sira kona-ba kualker asuntu sira inklui mós asuntu violensia bajeia ba jeneru, nune’e husi oportunidade ne’e hodi haforsa relasaun no komunikasaun hodi kontinua reforsa no kontinua aprofunda ita-nia parseria hodi servisu hamutuk hodi desmina informasaun ne’ebé lalos liuliu eliminasaun iha Violensia Bajeia ba Jeneru iha Timor-Leste.
Jerente Programa UNFPA ne’e enkoraja mós ba Jornalista sira husi media nasional no Asosiasaun Jornalista Timor Leste AJTL hanesan parseria ida importante ba UNFPA apoiu desemina informasaun sira ne’ebé di’ak ho lolos ligadu ba Violensia Bajeia ba Jeneru ho objetivu atu kontribui ba redusaun husi violensia liuliu ba feto no labarik feto.
Momentu ne’e Dircio husu ba feto no labarik feto ne’ebé mak durante ne’e esperensia violensia bajeia ba jeneru karik hasoru situasaun ne’e labele tauk hodi ko’alia sai tanba dadaun ne’e iha Timor-Leste iha rede referal ne’ebé forte no sistema jestaun ne’ebé forte kompostu husi sistema saúde, servisu Policia no Judicial nomós NGO lokál ne’ebé servisu esensial ba sobrevivente violensia bajeia jeneru.
Iha fatin hanesan Kordenador AJTL Teodozia dos Reis haktuir katak presiza hasa’e kapasidade jornalista nian atu halo kobertura ba asuntu kona-ba saúde públiku tanba konsidera importante no interligasaun, tanba durante jornalista kobertura iha area ne’e menus tebes.
“Jornalista presiza iha sensivel ba asuntu sira hanesan ne’e no dalabarak ita haree buat sira ne’e tabú ka lulik no ita labele ko’alia, tanba ne’e mak Ita-nia papel importante mak tenke kebra ka ke’e tabú sira ne’e hodi ko’alia sai no nakloke kona-ba informasaun sira ne’e”
Nune’e Nia mós enkoraja nafatin ba jornalista sira ne’ebé partisipa formasaun ne’e bele akonpaña ho di’ak ba asuntu hirak ne’e liuliu ba violensia bajeia ba jeneru tanba ida ne’e problema ne’ebé boot espera katak UNFPA nia suporta ne’e hodi ita bele ke’e nafatin hodi komprende di’ak hodi halo kobertura ba asuntu sira ne’e.
Formasaun ne’e partisipa husi jornalista na’in 20 ne’ebé kompostu husi media nasional, no hetan apoiu ba orsamentu husi UNFPA.
Jornalista: Maria de Rosa
Discussion about this post