Movimentu Feto Foinsa’e Timor-Leste servisu hamutuk ho Care Internasional iha Timor-Leste, realiza forum labarik feto ba dala tolu nian ho tema “haforsa feto no labarik feto nia kapasidade no sira nia lian” ne’ebe hala’o iha salaun Fokupers Dili.
Forum labarik Feto ba dala tolu ne’e, kada munispiu 12 inklui RAEOA reprezenta labarik feto nain rua, atu sira rasik diskute no koalia sai situasaun sira ne’e sira hasoru iha munisipiu.
Diretora Interina MOFFE-TL Denise Teresa hatete, Objetivu husi forum labarik feto ne’e atu fo espasu ba labarik feto sira husi munisipiu hodi halo diskusaun konaba issue-issue sira nebe maka sira infrenta iha sira nia munisipiu ida-idak, Identifika no konsolida issu labarik feto sira no define issue prioridade labarik feto nian, define asaun estratéjiku no rekomendasaun sira no asaun advokasia.
“bainhira ita ko’alia kona-ba asuntu labarik, ami labele koalia reprezenta tanba ita rasik la hatene saida mak sira hasoru iha munispiu, entun forum ida ne’e hanesan mekanizmu konsultativu, ne’ebe halibur labarik feto reprezentante munisipiu 13, atu sira rasik mai hodi hato’o preokupasaun ne’ebe sira enfreta iha sira-nia munisipiu liga ho kondisaun nesisidade, dezafius atu sira rasik mak define prioridade sira ne’ebe ita hanoin katak ita presiza atu relata ba iha parte relevante sira” dehan prezidente interina MOFFE Denise Teresa iha salaun Fokupers (10/10/2024)
Diretora ne’e hatutan depois de forum ida ne’e, sei produs plataforma labarik feto 2024 nian, no no produs plataforma planu advokasia, ne’ebe mak ita sei uza hodi halo advokasia ba ministeriu relevante sira, hanesan edukasaun, justiça, saúde nomos ministeriu soliedariedade sosiál.
“ba oin ita nia alin feto sira ne’e sei kontinua lori sira nia lian hodi halo advokasia ba governu, parlamentu nasionál no parte relevante sira, tanba ne’e MOFFE-TL husu nafatin komitmentu husi INDICA, CARE iha Timor-Leste no parseiru sira hotu hotu ba implementasaun plataforma labarik feto no palnu advokasia ne’ebé mak ita produs iha forum labarik feto 2024, hodi haforsa labarik feto sira nia lian no sira rasik bele goza sira nia diretu hanesan labarik” nia enkoraja.
Reprezentante CARE Timor-Leste Lina Monis Konsidera Atividade forum labarik feto importante los no husu atu forum labarik feto ne’e nafatin iha kontinuasaun hodi hato’o sira nia lian atu nune’e parte relevante sira foti dezisaun relevansia ho sira nia preokupasaun.
“Tanba sa ha’u dehan forum ida ne’e importante, tanba dalabarak imi iha problema, iha situasaun no lamentasaun lubuk ida ne’ebe mak imi hasoru, iha família, iha eskola, iha sosiedade, liga ho situasaun imi nian, maibe imi la hatene oinsá atu espresa, imi laiha dalan atu hato’o imi nia kestaun sira ne’e no laiha dalan atu koalia sai no husu ajuda liuliu alin sira iha munisipiu iha area rurál laiha koñesimentu no laiha informasaun atu ba iha ne’ebe”
Liu husi forum larbarik feto Lina Monis hatenten CARE nafatin iha komitmetu atu servisu hamutuk ho paresiru sira ne’ebé servisu foka ba asuntu labarik feto nian atu hamutuk buka dalan atu resolve feto no labarik feto nia situasaun no nia nafatin eskoraja labarik feto sira kontinua aprende barak, hadi’a kapasidade no atu hasa’e konesimentu no abilidade hodi prepara ba futuru ida mais di’akliu.
Iha Momentu hanesan Prezidente INDICA Dinorah Grandeneiro fo parabens ba labarik feto hotu iha mundo liuliu iha Timor-Leste, relasiona ho loron ninternasional labarik feto (11 de outubru).
Imi tenki orgullu tanba iha loron espesial ida ba imi ne’ebe mak hatudu katak globalmente no mos iha Timor-Leste tau importnasia ba imi nia presenza no partisipasaun iha dezenvolvimentu estadu no iha mundo. Liga ho partisipasaun feto nian espera ho selebrasaun sira hanesan ne’e bele motiva imi bele sai di’ak liutan no motiva imi atu diretu hanesan labarik feto ho diak, nune’e hatudu ba mundo katak valor ida feto ne’e iha duni, no feto ne’e iha valor importante hodi kontribui ba dezenvolvimentu”
Atividade Forum Labarik Feto ne’e realiza tanba MOFEE Parseiria ho Care iha Timor-Leste no hetan apoiu fundu husiAustralia Non-Governmental Cooperation Program (ANCP) Liu husi Care Timor-Leste.
Atividade forum labarak Feto ba dala tolu ne’e, MOFFE-TL halibur no organiza halo identifikasaun hili labarik feto nain 26 ne’ebe reprezenta nain 2 husi kada munisipiu hodi partisipa iha “forum labarik feto” ne’ebe halao durante loron 2 iha Dili.
Jornalista: Natalino Ximenes
Discussion about this post