Radio, online – Xefi IV Governu Konstitusional Primeiru Ministru (PM) Kay Rala Xanana Gusmão liu husi serimónia Inagurasaun ho entrega projetu kontruksaun uma 100 ba Komando F-FDTL.
Serimonia ne’e halao iha Metinaro 26 de Agostu foin lalais ne’e.Tuir mai diskursu kompletu PM Xanana Gusmão ne’ebe asesu husi radioliderdadedili online.
Ita nia Pátria nebé nurak hela né, sei la sai hanesan Estado soberano no independente ida, nebé timoroan tomak mak kaer rasik sira nia destinos, se karik, la iha esforço ho sacrifício husi maluk sira hotu nebé saran tomak sira nia an, hodi luta hasoru ocupante, iha funu ida ke halo durante um quarto de século ka tinan ruanulu-resin laran.
F-FDTL, nebé uluk hanesan braço armado resistência nian hasoru inimigo, ohin loron sai hanesan Forças Armadas modernas ida, nebé caracteriza ho espírito disciplina ida ke forte, sentido de-dever no orgulho patriótico nebé ás tebetebes, no, maski ho limitação meios humanos ho logísticos nebé, infelizmente, sei afeta maka’as sira hotu, sira consegue hatudu nafatin capacidade operacional nebé halo ema hotu admira, hanesan sira prova ona liuhusi missões nebé sira envolve bá.
Forças Armadas hanesan lutu-hún boot ida, hodi garante integridade territorial no tane metin independência nacional, tanba né mak responsabilidade exclusiva e obrigatória Estado nian mak oinsá bele garante condições hotu-hotu nebé tulun sira hametin nafatin coesão interna ho espírito de-corpo, buat nebé só bele hetan, liuhusi moral no bem-estar ba sira nia tropas hotu-hotu.
Timor-Leste País ida ke geograficamente ki’ik, maibé tanba la iha estradas nebé bele facilita ligação lais no segura entre fatin hotu-hotu no ladún hadia estradas, mak halo distâncias ne’e sai boot liután no dificulta tebetebes laços familiares entre ema sira nebé, tanba razão serviço, tenke sai ba fatin dook, husik hela sira nia fatin moris no hela bá.
F-FDTL, tanba sei limita sira nia hela fatin iha parcelas território balu laran, mak sira sente todan tebetebes tanba problema ida né, no tenke hasoru realidade katak, militares barak liu mak moris dook liu husi sira nia famílias, no la iha condições financeiras nebé permite ultrapassa contrariedade ka sasatan hirak né hotu.
Ita labele haluha katak ida né mak razaun ida hotu nebé hamosu crise peticionários sira nian, nebé sai aat liu ho acontecimentos trágicos iha 2006.
Militares barak tebes mak la sente laran kontente no hakmatek tanba sira tenke moris dook husi sira nia famílias, no la iha kbiit no biban atu bele bá vizita sira nia maluk, buat nebé la hanesan ho sira nia camaradas sira seluk, nebé pertence dunik ba zonas nebé sira serviço bá, besik sira nia uman no iha liu possibilidade atu hela hamutuk ho sira nia famílias rasik.
Ho objetivu atu hakmán situsaun difísil hanesan né, nebé hanesan injustisa boot ida ba efetivus barak F-FDTL nian, no atu husik sira hela hamutuk ho sira nia fén ho oan sira, no liu-liu, bele exerce ho motivação sira nia carreira militar nebé sira rasik mak hili, mak Governo hola iniciativa atu avança ho contrução complexo ida né nian.
Uma lubun ida né, nebé destina ba militares sira nebé ativus, no bele hamahon famílias to’o atus ida (100), consegue dunik harii, tanba República Popular da-China nia laran luak, hodi responsabiliza rasik ba ninia construção liuhusi companhia china nian ida, naran Chongqing International Construction Corporation, no agora mak foin halo entrega formal ba F-FDTL, i Estado timorense la gasta buat ida.
Ba Povo irmão chinês ho ba empresa construtora, no ba Senhor Embaixador Fu Yuanchong rasik, hau ható, lori hau nia naran rasik no mos lori povo timor tomak naran, sinceros agradecimentos ho votos de-gratidão ba gesto altruísta de-amizade ho simpatia ida né tan, ba Timor-Leste, hamutuk ho gestos sira seluk nebé hatudu ona mai ita hotu, iha tinan hirak né laran.
República Popular China hamriik nafatin iha linha oin, hamutuk ho países sira seluk nebé kontribui mos ba construção ita nia Nação né nian, la exige contrapartidas ba ita, sá-tan cobra buat ruma.
Ita hotu fiar metin katak ajuda ida né, desinteressada, no nia hun ho abut mak genuína solidariedade chineses sira nian ba povos sira seluk nebé precisa tulun, tanba né mak ita sei la haluha oferta hanesan né, maski ita só bele selu ho ita nia amizade no laran moos ba sira.
Ami hakarak tebetebes atu continua coopera ho Governo chinês iha áreas indispensáveis ba desenvolvimento económico ho social País né nian, la ho laran ta’uk no sei la hakfodak ho críticas.
Muito obrigado, Senhor Embaixador, ba buat hotu nebé China halo ona ba Timor-Leste. Militares ho F-FDTL, Uma hirak nebé hahú ohin imi atu hela bá, pertence ba Instituição, la’ós imi nian mesak. Imi nia camaradas sira seluk ho sira nia famílias, aban-bain rua sei bele hela mos iha uma hirak né.
Tanba n’e mak, imi nia obrigasaun boot ida, la’ós deit moral maibé mos disciplinar, mak atu cuida no bali didi’ak complexo né tomak, hodi mantem nia dignidade hanesan espaço ida ho natureza militar. Bairro ida né tenke hanesan nafatin motivo orgulho boot ida ba maluk sira hotu nebé hela iha né no, liu-liu, ba Instituição Militar tomak, tanba ne’e mak entrega ba ita boot sira nia liman, atu assegura katak sei acontece dunik nuné.
Timoroan tomak tau hela matan iha sira nia Forças Armadas, tanba né mak imi tenke buka sai nafatin hanesan fonte ezemplu no inspirasaun ba povu sira hotu.
Hau fiar katak zona abitasaun foun ida né sei sai kmanek tebetebes, tanba hadi’a ho cuidado, tanba moos no tanba hanesan fatin nebé dame no hakmatek ba ema sira nebé hela iha né, ibele mos hada’et ba fatin sira seluk atu sira banati tuir. Ba famílias sira hotu nebé atu mai hela iha né, hau ható felisidades.
Discussion about this post