DSMPPTT – UNTL  Entrega Ruin Saudozo Sinis ba Familia

Radio online – Dewan Solidaritas Mahasiwa Pemuda-Pelajar Timor-Timur (DSMPPTT) hamutuk ho UNTL halibur mate ruin saudozu Joao Ximenes alias “Sinis” nebe’e mate tanba hetan oho husi milisia iha Distritu Covalima tinan 1999.

Saudozu Sinis mate hamutuk ho nia kolega Bernardino Simão ne’ebe to’o agora ninia (Bernardo) nia ruin seidauk hetan. Membru DSMPPTL ne’e hetan oho husi  milisia Mahidin ( mati hidup dengan Indonesia ).

Iha serimonia vurneral mate ruin atu entrega ba familia, mate ruin saudozu Sinis sei halo misa despedida ho nia kolega patriota sira mak uluk halibur an iha DSMPPTT ne’ebe iha mahon UNTL nian.

Eis Ko’ordinador nomos fundador DSMPPTT, Antero Benedito da Silva hateten, saudozo Sinis nia mate ne’e sitematiko tebes. Importante ba estudante no ba prosesu justisa iha nasun ne’e. Husu ba Komisaun de homenazen atu hola atensaun ba kazu estudante sira seluk ne’e mate ba funu iha ultima faze da rezistensia iha 1998-1999.

“Hau dehan matebian ne’e nia mate sistematiko tamba iha momentu ne’eba DSMPPTL la permiti haruka saudozu ho nia kolega atu ba iha Covalima. Husi Universidade mak haruka Saudozu ho nia kolega ho ida ne’e hau husu komisaun homenazen atu konsidera saudozu estudante UNTL ho membru DSMPPTL mak mate iha prosesu ukun-rasik an,” Antero husu.

Alin Saudozo Sinis, Vicenti Gusmão Soares  hateten, ladun satisfas ho ema sira ne’ebe uluk lori Indonesia no militar mai barak ida ne’e nomos forma milisia hodi oho ema barak, maibe agora sira moris livre no kontenti hela deit.

“Hau husu ba familia estudante nebe’e  sira nia maun ka alin mate iha funu laran mai ita  hotu  hamutuk ejiji ba ita nia Governu atu  hari Justisa iha Timor Leste  konaba autor ba krimi graves sira,”nia apela.

Antes atu ba ke’e  materuin saudozu Sinis, familia sei tu’ur hamutuk ho DSMMPTT hamutuk ho estudante UNTL. Iha dia 28 de Agostu 2011 foin lalais ne’e  aranka ba Sub-Distritu Zumalai. Iha prosesu ne’e materuin  saudozu Sinis sei halao serimonia tradisaun no husu lisensa husi komunidade Zumalai.

Tuir plano materuin saudozu Sinis sei lori ba iha nia moris sub-distritu Quelicai, Distritu Baucau hodi halot ikus liu. Denkansa em pas. Com patriotas.