Díli – Ohin-loron mitu ida ne’ebé sosiedade fiar mak feto iha obrigasaun atu servisu iha uma-laran. Maibé realidade hatudu katak era ida agora mós iha mudansa tebes ba feto sira. Feto barak hahú moris ho indepedente no buka atu halakon mitu hanesan ne’e iha sosiedade nia leet.
Feto foinsáe ida ne’ebé koko atu luta hasoru mitu ne’e mak Jorgia Barros ne’ebé harii rasik nia negósiu arte liman-ain-kukun (Nail Art) no make-up, hahú iha tinan 2019, depois aprende mesak hosi YouTube.
Dezde estuda Enjenaria Sivil iha UNPAZ iha 2014 no gradua iha 2019 hosi Departamentu Enjinaria Sivíl, Aseo, naran estimada hosi Jorgia, hahú hanoin ona atu loke negósiu iha área liman-ain-kukun (Nail Art) no make-up no aprende barak liuhosi kanál YouTube.
Bainhira aprende iha kanál YouTube Aseo hahú pratika ba nia an no depois ba nia kolega sira. Hosi kolega sira ne’e mak ninian servisu hetook ema barak hatene, no husi ne’e nia hahú hetan rendimentu.
Husi rendimentu sira ne’e nia utiliza hodi sosa tan materiál oioin dezde 2019 to’o loke salon iha Manleu ho naran Jorgeous & Beauty (JB) iha 2023
“Prosesu loke salon ho ha’u-nia ideia rasik no lori prosesu ne’ebé naruk tebes; hahú ha’u sei estudante hanoin ne’e ona maibé la to’o no ha’u sempre aprende buat lubuk ida husi kanál Youtube kona-ba make-up, nails art, depois halo pratika ba ha’u nia an rasik no kolega sira seluk no ikus-mai sira dehan furak entaun ha’u iha inisiativa hakarak loke salon rasik, agradese ba Na’i ha’u bele realiza ona iha tinan ne’e,” Aseo hatete.
Jorgeous & Beauty nia fatin ema seidauk hatene barak no nia seidauk hetan rendimentu barak, maibé nia nunka lakon esperansa basá ba nia loke salon ne’e sai hanesan karreira favoritu ida ne’ebé mak durante ne’e nia hakarak realiza iha nia moris.
Oan husi Miguel Barros & Evangelina da Costa ne’e hatete, “Maske ema seidauk hatene barak maibé ha’u nafatin haksolok tanba ikus-mai negósiu ne’e nia rendimentu sa’e no kada semana ha’u hetan $ 120 ba make-up depende ema booking no lukru ne’ebé ha’u hetan uza hodi sosa tan materiál ne’ebé seidauk iha no balun uza ba nesesidade lorloron.”
Kona-ba dezafiu oioin ne’ebé nia enfrenta, feto foinsa’e tinan 28 ne’e hatete katak nu’udar ema ita sempre hasoru dezafiu maibé importante mak hanoin pozitivu nafatin no foka ba objetivu ne’ebé aas-liu.
“Moris umana sempre iha dezafiu maibé oinsá ha’u ultrapasa dezafiu hirak ne’e mak ha’u sempre halo promosaun ba ha’u nia salon, ho hanoin pozitivu katak Jergoeous & Beauty (JB) Studio, harii la’os de’it atu buka lukru, maibé hakarak hatudu mós ha’u-nia karreira ne’ebé iha ba ema hotu katak feto hotu iha direitu ne’ebé hanesan la’os de’it atu halo servisu uma nia,” Aseo enfatiza.
Feto orijem Ainaro ne’e husu atu feto sira luta nafatin ba igualdade jéneru tanba sedu ka tarde igualidade jéneru sei sai nu’udar faktu ida.
“klaru katak moris iha era agora ne’e difisil, maibé ita, nu’udár feto foin-sáe la-bele lakon esperansa, basá moris ne’e atu sai fásil depende hosi ita nia esforsu,”, Aseo hatutan.
Ikus-mai Aseo husu atu maluk feto foin-sáe sira iha nafatin esforsu hodi realiza ita-nia mehi katak igualidade jéneru ne’e eziste.
Reportajen: Ekipa Formandus Training GSR-4, Grupo 2
Editor/a: Desy Reis & João da S. Sarmento
Discussion about this post