Dili – Ba maluk sira ne’ebé sintoniza hela Rádiu Komunidade Defisiénsia Timor-Leste hosi Uma Aimutin ho frequensia 102.3 FM, Dili, Efifania dos Santos Barros la’ós ona ema foun. Basá, Fania mak agora sai nu’udar jerente programa, dezde 2022. No konfiansa ne’ebé Fania hetan mós mosu iha tempu ida-ne’ebé lalais loos: fulan rua de’it. Basá, depoizde fulan rua halo estájiu iha Radio Komunidade Defisiénsia Timor-Leste, hafoin halo mudansa pozitivu iha rádiu, Fania hetan konfiansa hodi jere RKDTL.
“Loron dahuluk ami estájiu iha fatin ida-ne’e menus ekipamentus no rekursu humanus no mós ema atu maneja iha área komunikasaun; momentu ne’ebá ha’u iha hanoin atu halo mudansa ba iha rádiu ne’e, nune’e ha’u komunika ho diretora oinsá kria pájina Facebook RKDTL nian hodi hatun notísia online, no ikus-mai hetan konkordánsia hosi diretora hodi kria pájina Facebook RKDTL nian,” Fania fó-hanoin.
Depois kria tiha pájina Facebook, Feto ho idade 23 ne’e mós halo esforsu hodi kria ligasaun ho parseiru no organizasaun internasionál sira iha Dili hodi hetan suporta ekipamentu rádiu nian.
“Ha’u iha hanoin seluk atu hetan ekipamentus mai iha rádiu entaun buka meius oinsá bele servisu hamutuk ho NGO sira iha Dili laran hanesan JICA, CARE, Plan International, no GIZ hodi hetan apoiu,” Fania haktuir ba ekipa formandus iha Aimutin.
Tanba koñesimentu oioin ne’ebé feto naturalidade Ainaru ne’e hetan hosi ninian estudu iha Departamentu Comunicação Socialiha UNTL, Fania asumi pozisaun oioin durante períodu estájiu, hahú hosi editora, aprezentadora to’o xefe redasaun, molok asumi responsabilidade nu’udar jerente programa.
Ba Fania, servisu hamutuk ho ema ho defisiénsia sai importante atu luta ba inkluzaun sosiál iha Timor-Leste hodi nune’e bele atinji prinsípiu ida hosi Ajenda ONU nian ba 2030, la husik ema ida iha-kotuk.
“Ha’u hakarak kontribui ba ema ho difisiénsia no papél Governu nian katak la-bele tau ema difisiénsia iha kotuk no sura mós ho sira hanesan inkluzaun sosiál iha Timor-Leste, entaun ha’u hakarak halo programa ba ema ho defisiénsia no promove nafatin sira atu nune’e la bele husik ema ida iha-kotuk,” Fania realsa.
Tuir Fania, Timor-Leste adopta Estadu direitu ida demokrátiku no tan ne’e mane no feto soi direitu ne’ebé hanesan.
Finalista Comunicação Social-UNTL ne’e hameno ba feto maluk sira atu investe maka’as iha edukasaun hodi kapasita an no karik hetan oportunidade atu sai líder, la bele moe aplika matenek hodi halo mudansa ba ema barak nia moris.
Reportajen: Ekipa Formandus Training GSR-4, Grupo 6
Editor/a: Desy Reis & João da S. Sarmento
Discussion about this post