Timor-Leste no Australia asina Akordu Kooperasaun Defeza foun iha Canberra, Australia, iha Kuarta-Feira ne’e.
Tuir komunikadu imprensa ne’ebe Ekipa Radio Liberdade asesu liu husi portal ofisial Primeiru Ministru Asutralia nian, akordu ida ne’e hanesan konkordansia forsa rai rua nian atu fo protesaun, responsibilidade, no privilejiu resiprokal ne’ebe nasaun ida-idak sei fo ba forsa nasaun rua nian iha sira nia teritoriu.
Akordu Kooperasaun Defeza ne’e asina husi Australia nia Ministru Defeza Richard Marles no Ministru Defeza Timor-Leste, Filomeno Paixao, hafoin enkontru entre Primeiru Ministru Anthony Albanese no Presidente Timor-Leste José Ramos-Horta iha Canberra, Austrália.
Iha nota imprensa ne’e, Primeiru-Ministru Australianu, Anthony Albanese hatete: Austrália no Timor-Leste partilha relação especial hanesan vizinhos, ho istoria no lasus profundus. Ita servisu ona ba Akordu Kooperasaun Defeza ne’e liu ona dékada ida no asinatura ohin hanesan passu signifikativu iha ita nia parseira.”
Iha fatin hanesan, Vice-Primeiru Ministru no Ministru da Defeza Richard Marles hateten: “Akordu Kooperasaun Defeza hatudu kapitulu foun iha relasaun entre Australia no Timor-Leste. Ita vizinhu no partilha domino marítimo mak Tasi Timor. Hau hakarak ba oin Akordu Kooperasaun Defeza ne’e sei ajuda no permite patroliu marítimas hamutuk entre Australia no Timor-Leste.”
Akordu ida ne’e permite Australia no Timor Leste hametin kooperasaun iha setor defeza no seguransa, espesialmente iha area marítima, konsidera Australia no Timor-Leste nia ketan tasi.
Reportajen: Eva Florentina
Editor: Fernanda Maria
Discussion about this post