Dili – Governu Timor-Leste liu husi Ministériu Defeza no Ministeriu Interiór forma ekipa operasaun konjunta entre Falintil-Forsa Defeza Timor-Leste (F-FDTL) no Polísia Nasional Timor-Leste (PNTL) hodi kontrola situasaun seguransa iha Dili laran no territorio tomak hafoin mosu konfrontasaun entre rival arte marsiais iha loron hirak ikus ne’e.
Tuir Nota Despaxu ne’ebé Radio Liberdade asesu liu husi pájina Facebook Primeiro-Ministro Taur Matan Ruak katak akontesimentu sériu hirak ne’ebé mosu iha loron hirak ikus ne’e entre grupu sira ne’ebé integra ba arte marsiais, liliu konfrontu iha loron segunda lokraik iha Dili, obriga governu atu foti medida forte hodi prevene aktu sira hanesan ne’e atu espalla ba fatin seluk hodi kria instabilidade nasionál.
“Haree katak hahalok perturbasaun orden públiku sira ne’e wainhira la halo intervensaun lalais bele sai aat liu tan iha Dili no hamosu akontesimentu hanesan iha fatin seluk iha teritoriu nasionál, hodi kria inseguransa jeral. Konsiente ho mudansa sériu iha orden públiku ida ne’e, maske la justifika atu deklara Estadu Exesaun Konstitusional, ida ne’e obriga Governu atu foti medida exesional ba asaun konjunta entre F-FDTL no PNTL hodi prevene kualker tentative atuasaun criminal,” Nota Despaxu ne’e haktuir.
Nune’e, nota despaxu hatutan, governu hasai orden ida ne’e tuir paragrafu 2 husi artigu 2 Dekretu Lei númeru 7/2019, 17 Abril, altera husi dekretu lei númeru 57/2020, 11 Novembru, konaba organiku 32/MI/VII/2020, hodi delega poder ba Vise Ministru Interiór no Ministru Defeza estabelese operasaun konjunta entre F-FDTL no PNTL.
“Autoriza implementasaun operasaun konjunta entre F-FDTL no PNTL, liu husi operasaun patrulla iha teritoriu tomak no vijilansia espesial no kontrolu ba fatin hotu ne’ebé mak sensivel iha Dili laran, ho objetivu atu prevene no hamenus atividade kriminal ne’ebé mak kauza instabilidade sosial.”
Operasaun konjunta ida ne’e hahu iha loron 6 Setembru to’o loron 13 Setembru, 2022, no iha posibilidade sei hanaruk wainhira konflitu kontinua mosu.
Reportajen: Ekipa Radio Liberdade
Editor: Fernanda Maria
Discussion about this post