Dili- Diretór Ezekutivu Assosiasaun Fulgencio Halibur Joven Timor-Leste AFHJTL ho naran kompletu Fulgencio Maia naran bolu Gencio. Husi Munisipiu Bobonaro Posto-Administrativo Atabae, Suco Rairobo moris iha loron 28 fulan Maiu tinan 2000. Fulgencio oan husi aman Izac Mau Bili no Apolonia Cardoso nia nu’udar oan primeiru husi maun alin na’in lima.
Fulgencio hahú estudu ensinu báziku filial Rairobo Atabae iha tinan 2009 remata iha tinan 2014, kontinua estudu Pre-Sekundáriu eskola no 1 Atabae tinan 2015 remata iha tinan 2017, nune’e kontinua kedas estudu Sekundáriu iha Eskola Sekundáriu Gerál Nino Konis Santana Gleno Ermera iha tinan 2018 remata tinan 2020.
Bainhira remata estudu iha banku sekundáriu Fulgencio la kontinua estudu banku Universitáriu tanba problema ekonómia família nian, nune’e iha tinan 2021 joven ne’e foti desijaun halo servisu hanesan sekuriti durante tinan ida.
Mane origen husi Bobonaro ne’e, bainhira hetan saláriu oituan iha momentu servisu hanesan sekuriti no ikus husik hela servisu ne’e, tanba nia iha kapasidade ba halo dezeña no ukir fotografer entaun nia inisiativa harii fali arte hodi halo ukir fotografer iha ai no vidru inklui produz sasan ne’ebé mak ema bele uza.
Entretantu tama tinan 2023 mane ho idade 24 ne’e sai hanesan inisiatór produz materiál skil test lian Korea nian iha Timor-Leste ho modalidade oin haat hanesan, Kadeli, Ai Kadi Kakutak, Monta Baut nomós Ai Kaisa.
Fulgencio inisiativa halo produsaun hirak ne’e hodi ajuda joven Timor oan ne’ebé iha mehi hakarak servisu iha Korea liuliu hirak ne’ebé tuir ona teste ba lian Korea. Tanba ita hatene katak kada tinan joven sira sempre buka servisu iha rai liur hodi hadia ekonómia família nian.
Entretantu Fulgencio haktuir husi atividade hirak ne’e bele ajuda mós sentru formasaun lian Korea iha Dili laran, inklui iha Munisiupio hodi fó ajuda ba formandu lian Korea sira ne’ebé atu tuir teste liuliu area skil test nian, Dehan Nia.

“Nune’e iha loron 14 fulan jullu tinan 2024 ha’u iha ona inisiativa rasik hakarak harii sentru formasaun mais la hatene oinsá atu harii, maibé ho graca Maromak nian, ho fuan boot hodi foti desijaun kontinua buka fatin no buka kolega sira bele tau hanoin hamutuk no ha’u halo karta autorizasaun ba autoridade lokál no autoridade seguransa hetan autorizasaun hodi harii Assosiasaun ne’e iha Aimutin, tanba ne’e realiza duni sentru formasaun ne’e iha loron 20 fulan jullu tinan 2024 ho naran Centro Fulgencio Halibur Joven Timor-Leste FHJTL “Hateten Fulgencio ba Jornalista Radio Liberdade iha loron (Segunda feira, 20/01/2025).
Fulgencio salienta depois harii ona assosiasaun ne’e, iha loron 03 fulan Augostu ekipa sira komesa ona halo rejistrasaun ba lian Korea no Ingles, maibé bainhira komesa formasaun ekipa sira halo karta konvite ba autoridade no inan aman sira bele partisipa abertura iha altura ne’eba, Tenik Nia.
“Objetivu bolu hamutuk autoridade lokál no inan aman sira inklui sentru formasaun sira seluk ne’ebé hetan ona legalidade hodi mai partisipa abertura ba estudante etapa primeiru nian ba sentru formasaun ne’e, tanba iha loron ne’e sai hanesan istoria ba assosiasaun ou tali ida hodi kesi metin ami-nia relasaun ho autoridade, komunidade no parte estadu nian”.
Entretantu Diretór ezekutivu ne’e hateten enkuantu atividade ne’e la’o, Nia mós komesa buka esperensia kona-ba oinsá lori Sentru FHJTL ba legalidade, entaun durante fulan tolu nia prepara estatutu akta no morada sentru nian no koko husu informasaun ba Ministerio Justica, nune’e hetan informasaun katak tenke buka ema na’in 10 hodi sai hanesan fundadór, nune’e to’o dia 3 fulan Dezembru tinan 2024, hetan ona legalidade husi Ministerio Justica no notariadu bele públika ba Jornal Republika, nune’e ikus tau naran Sentru ne’e muda fali ba Assosiasaun Fulgencio Halibur Joven Timor-Leste AFHJTL, Tenik Diretór.
“Ha’u agradese tebes tanba prosesu hirak ne’e, ami na’in 10 esforsu hamutuk no ha’u sai hanesan Diretór ezekutivu iha Assosiasaun ne’e to’o ohin loron ami nafatin hamorin Assosiasaun nasionál liuhusi atividade oioin ba públiku”.
Foin sa’e ho idade 24 hateten durante harii Assosiasaun dezafiu barak sira hasoru maibé hanesan joven, dezafiu sira ne’e enkoraja sira ho fuan boot hodi luta tanba iha motto ne’ebé hateten, hanoin ida mehi ida no susesu hamutuk, Haktuir Fulgencio.
“Nune’e iha tinan kotuk formandu ba lian Korea nian iha ami-nia assosiasaun AFHJTL hamutuk 40 pessoas no formandu lian Ingles hamutuk 50 pessoas, no skil husi area sira hanesan fabrika, peskas no agrikultura mak hamutuk 500 pessoas. Maibé iha tinan ida ne’e, ami simu ona formandu husi lian Korea hamutuk 200 pessoas, Ingles 50 pessoas nune’e totál estudante iha tinan rua nia laran hamutuk 840 pessoas
Nia mós afirma tan rekursu umanu iha assosiasaun AFHJTL hamutuk 25 pessoas inklui iha sentru sukursal iha munisipio, no fahe ba asembleia gerál, konsellu administrasaun no fiskal, nomós sentru ne’e rasik fó ona graduasaun lian Korea no Ingles iha etapa primeiru hamutuk 300 pessoas hodi kompete ba merkadu servisu.
Molok remata enkoraja mós ba joven Timor oan sira iha rai-laran no rai liur sira katak, nafatin aprende labele baruk halo buat di’ak, tanba mundu ohin loron ne’e mundu kompetetivu tanba ne’e aproveita oportunidade hirak ne’e hodi prepara ba futuru ida ne’ebé di’ak liu. Liafuan seluk mak hateten, maske dok karakol nafatin la’o, maske udan manu sira nafatin semo, nune’e aproveita oportunidade ne’e konvida joven produtivu sira bele hakbesik mai assosiasaun AFHJTL hodi bele aprende hamutuk, Gencio Hakotu.
Jornalista: Marrya de Rosa & Irene Teresa
Discussion about this post