Dili,19/07/2024-Movimentu Feto Foinsa’e (MOFFE) servisu hamutuk ho Fundasaun Ázia no organizasaun parseiru sira, fornese worskshop kona-ba importansia Podcast ba Mudansa Sosiál, inklui introduz no lansa programa podcast “Lian Igual/Equal voices” ba públiku hanesan Plataforma ida hodi fahe no rona grupu tarjetu sira-nia perspetiva no issu ne’ebé relasiona ho igualidade jéneru.
Tuir Diretora MOFFE Denise Tereza iha nia lian makloke hateten, MOFFE dadaun ne’e servisu hamutuk ho Fundasaun Asia no parseirau sira iha Programa Power Up/ Tempu ba Mudansa implementa atividade oi-oin ne’ebé tarjetu direta ba feto no foin sa’e sira.
“Programa Podcast Lian iguál ne’e iha inisiativa ida ne’ebé ita dezeña ona atu halo entrevista, diskusaun, no fahe istória inspirasaun husi feto no foin sa’e sira, inklui servisu hamutuk ho juventude, ema ho difisiensia, komunidade LGBTIQ+”. Dehan Denise bainhira halo lansamentu ba Programa Podcast iha Bebora.
Diretora MOFFE Denise Tereza hamrik hato’o hela nia diskursu
Aliende ne’e Diretora salienta katak ema hotu-hotu iha kbiit atu kria mudansa no progresu tanba ne’e, MOFFE fiar katak ho podcast “ Lian Iguál/Equal Voices” no “ Programa Power Up/ Tempu ba Mudansa”, kontribui ba halo mudansa iha sosiedade no promove igualidade jéneru no direitus umanus iha Timor-Leste, Haktuir Denise.
Iha fatin hanesan reprezentante Fundasaun Ázia Héctor Salazar Salame, haktuir, atividade ne’e importante tebes ba komunidade sira iha Timor-Leste, tanba dalaruma ema halo komunikasaun ba malu presiza hili fatin ne’ebé seguru.
“Ita ema presiza fahe esperiénsia ba malu, no iha komunikasaun ba malu, tanba iha ema na’in rua ne’ebé dalaruma iha hanoin la hanesan nune’e ita presiza halo diskusaun ruma, tuir ema nia prespetiva” dehan Héctor Salazar iha nia diskursu.
Reprezentante Fundasaun Ázia Héctor Salazar Salame hato’o hela nia diskusrsu ba partisipante sira
Tercio de Sena Lopez nu’udar Jestór Programa Tempu ba Mudansa haktuir, ba oin sei halo planu hodi konvida foin sa’e sira ne’ebé mak ativu atu bele fahe sira-nia hanoin kona-ba asuntu sosiál sira ne’ebé akontese iha rai-laran nune’e bele halo mudansa.
“ita sei haree tópiku ne’ebé iha liga ho situasaun reál sira iha ita-nia rai laran, nune’e mós prepara asuntu sira liga mós ho organizasaun sira-nian servisu, hanesan asuntu edukasaun sivika, saúde reprodutiva inklui igualidade jéneru tanba MOFFE mós servisu makas asuntu sira ne’e. Tanba ne’e, sei konvida foin sa’e sira mai fahe sira-nia hanoin no esperiénsia” dehan Tercio hafoin remata lansamentu podcast.
Foto hamutuk hafoin lansa podcast.
Relasiona ho programa ne’e hetan partisipante husi Ativista, Femenista, The Asia Fundation, Care, SEI, Plan International, Mane ho Vizaun Foun, no parseiru servisu sira hanesan CBRNTL, CODIVA, no FMDC.
Discussion about this post