Dili, 01/07/2024– Asosiasaun Halibur Defisiénsia Matan Timor-Leste, (AHDMTL), hanesan organizasaun naun governamental ne’ebé luta ba ema ho defisiénsia liu husi promove sira iha edukasaun, justisa, saúde no asesu ba servisu hodi buka solusaun ba dezenvolvimentu inkluzivu hanesan inovasaun atu hametin mundu ida ne’ebé asesivel no edukativu.
Tuir diretór ezekutivu AHDMTL Gabriel Pociano de Sousa hatete realasiona ho selebrasaun Aniversario ba dala 13, ho tema Hamutuk Hametin no Haforsa AHDMTL ba futuru ida ne’ebé Prospero” ne’ebé existe iha Timor-Leste hodi halibur defisiénsia sira atu hare mós ba problema sosial ne’ebé mak ema defisiénsia sira hasoru iha area rural ho nune’e sira komemora hamutuk ho maluk defisiénsia matan no komunidade iha sentru AHDMTL.
Iha selebrasaun ne’e hatudu katak asosiasaun harii iha prinsípiu rasik atu defende valor, proteje direitu ema ho defisiénsia nian liuliu refleta ba kontestu Timor nian ne’ebé fó liberdade tanba adopta direitu umanus nian tanba iha mós artigo 21 ko’alia kona ba direitu ema ho defisiénsia sira nian tanba ne’e labele husik ema ida iha kotuk” hatete diretór ezekutivu AHDMTL iha Manleuana.
Iha fatin hanesan prezidenti Board AHDMTL Gilberta dos Santos Pereira hatete HDMTL selebra aniversario ba dala 13 ne’e hanesan asosiasaun ne’e mak sei joven hela maibé hare ba servisu ne’ebé mak durante ne’e hala’o uluk ho peskiza foti ema defisiénsia husi areas rurál lori mai iha AHDMTL liu husi surfei ka intervista no iha programa ida hakbiit instituisaun hanesan fo formasaun ba staff sira atu tau matan ba maluk defisiénsia matan sira.
“AHDMTL iha mós programa hanesan kapasitasaun no edukasaun ba membru sira ne’ebé akumula iha fatin ne’e iha feto no mane tanba ne’e ami sei tau iha dormitorio feto, mane ami faselita sira ho letra Braille no lingua portugues no lingua Ingles, arte kultura inklui musika liu husi formasaun sira ne’e atu hasae sira nia kapasidade iha mundu inkluzivu” dehan prezidenti Board AHDMTL Gilberta dos Santos Pereira.
AHDMTL iha ona susesu transforma maluk defisiénsia sira bele asesu ona ba edukasaun naun formal, edukasaun formal hanesan iha eskola sekundária, universidade defisiénsia balun finaliza ona estudu iha universidade maibé sira nafatin hasoru dezafios balun mak desde iha tinan 2011 to’o agora seidauk iha fatin sufiente ba sira atu halo atividade.
“AHDMTL mós seidauk iha fundus rasik atu sustenta atividade iha tinan lima tuir mai tanba hetan de’it apoiu fundus balun husi ajénsia no parseiru balu hare liu ba projetu ne’ebé kontratu husi tinan ida to tinan rua remata no laiha kontinuasaun tanba ne’e husu ba governu atu bele tau mós importánsia ba ema ho defisiénsia matan sira” esklarese diretór.
Tuir dadus Ema ho defisiénsia matan iha Timor-Leste iha tinan 2015 hamutuk 14.823 mil no iha tinan 2022 seidauk iha dadus espesifiku maibé iha ema ho defisesnia iha tipo oi-oin mak total 93.371 mil.Iha selebrasaun ne’e hetan partisipa husi ADTL, Fontil, World Vision no partisipante másimu husi membru AHDMTL.
Jornalista: Natalina Araújo & Arlindo R. Nunes
Editor: Natalino Ximenes
Discussion about this post