DILI, 06/06/2024- Asosiasaun Jornalista Timor-Leste (AJTL) konsidera aktu pesoál protokolu hasoru jornalista Tatoli ne’e hakanek ona liberdade imprensa no valór demokrasia iha Timor- Leste iha tempu ne’ebé Timor-Leste ninia index Liberdade imprensa tuun husi TOP 10 ba TOP 20. AJTL haree katak aktu violentu ida-ne’e sei afeita index ranking liberdade imprensa iha tinan sira tuir mai.
“Asosiasaun Jornalista Timor Lorosa’e (AJTL) ne’ebé durante ne’e halo advokasia hodi promove no hametin liberdade imprensa no liberdade espresaun iha país demokrátiku ida-ne’e’ haree katak aktu violente pesoál protokolu RAEOA nian hasoru jornalista Ajénsia Notísioza Tatoli, Abilio Elo Nini iha 4 Juñu 2024 nuúdar tetantiva no ameasa ida ba independénsia jornalizmu no liberdade imprensa iha Timor-Leste” informa portavoz Acacio Pinto liu husi Konferensia Impresa iha sede AJTL Fatudada Dili ohin.
Iha Konstituisaun RDTL, Artigu 40 no 41 no Lei Komunikasaun Sosiál Artigu 41 kona-ba atentadu ba liberdade informasaun, Garantia liberdade imprensa ne’e mós haktuur iha Lei Komunikasaun Sosiál, Artigu 8 no artigu sira seluk Lei Komunikasaun Sosiál.
Nia dehan Liberdade imprensa mak sai nu’udar espasu ba sidadaun sira atu hato’o sira nia hanoin no komentáriu hodi hakunu prinsípiu check and balance ba servisu hotu-hotu entiadde Estadu nian.
“Atu proteje kualidade demokrásia iha Timor-Leste iha kontestu garante boa governasaun no kontabilidade, midia no jornalista hola papél importante atu asegura sidadaun sira nia direitu espresaun nian no sira nia direitu ba informasaun liuhusi kobertura no publikasaun notísia no programa sira mídia nian. Entaun, entidade hotu-hotu iha obrigasaun atu fó espasu livre ba jornalista sira atu asesu ba informasaun sira ne’ebé iha ligasaun ho serbisu públiku nian”
Iha rejime sistema polítika demokrasia, iha ámbitu liberdade imprensa nian, mídia no jornalista presiza livre atu hala’o sira ninia serbisu iha fatin ne’ebé deit. Liuliu iha espasupúbliku hanesan instituisaun sira Estadu nian. Iha kontestu ida-ne’e presizamente tenke iha garantia ida husi aparellu estadu atu mídia no jornalista sira livremente halo kobertura ba asuntun no informasaun ne’ebé iha ligasaun ho servisu públiku nian sein impedimentu.
Bazeia ba situasaun iha leten AJTL hakarak hato’o nia pozisaun hanesan tuir mai:
AJTL kontra no kondena aktu violentu hasoru jornalista Tatoli ne’ebé komete husi pesoál protokulu iresponsavel RAEOA nian, tanba aktu violentu ne’e sei hatauk jornalista no mídia atu iha kontestu kobertura no publikasaun notísia, liuliu atu garante papél media kontrolu sosiál.
AJTL mós konsidera aktu violentu ida-ne’e la-hatudu mentalidade demokrátiku pesoal entidade sira Estadu nian atu garante boa governasaun no kontabilidade iha país demokráiku Timor-Leste. Maibé hatudu fali mentalidade vandalizmu hodi impede midia no jornalista atu asesu ba informasaun sira ne’ebé iha ligasaun ho servisu públiku nian.
Ho pozisaun ida-ne’e, AJTL husu ba:
Prezidente RAEOA, Sr. Rogério Tiago Lobato atu foti medida no sansaun forte hasoru pesoál protokolu ne’ebé halo aktu violentu hasoru jornalista Tatoli iha espasu públiku iha Oecusse-Ambano.
Husu SECOMS atu komunika ho instituisaun sira Estadu nian atu respeita mídia no jornalista nian servisu no kolabora atu sira livremente esesu ba espasu públiku hotu-hotu hodi asesu inforrmasaun sein iha impedimentu.
Conselho de Imprensa no Asosiasaun Jornalista hotu-hotu atu kontinua sosializa Lei Kcmunikasaun sosial ba entidade sira Estadu nian, liuliu entidade sira RAEOA nian atu sira komprende papél mídia no jornalista nian ha país demokrátiku ida-ne’e.
Jornalista no kanál mídia hotu-hotu iha rai laran atu fó salidariade ba malu hodi kontinua publika kazu ne’e to’o hetan solusaun loloos no justu.
Jormalista no kanál mídia hotu-hotu atu nafatin kumpri Kódigu Étika Jornaístika, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé de’it atu nafatin asegura no garante liberdade imprensa no liberdade espresaun iha Timor-Leste.
Jornalista: Natalino Ximenes & João de Araújo
Discussion about this post