Angelina da Silva Feto Potensial ida husi Maubisse sai Orador iha Loron Internasional Feto ne’ebé Organiza husi TAF

Dili:08/03/24- Angelina da Silva Diretora Asosiasaun Feto Hanoin ba Oin-Maubisse, feto potensial ida ne’ebe durante luta hodi apoiu ekonomia feto nian, sai orador ba seminariu ne’ebé organiza  The Asia Foundation (TAF) ho tema jeral “Liberdade no Espasu ba Feto iha Timor-Leste” no tema espesifiku ba Agelina mak Oportunidade Ekonomia ba Feto sira.

Tema ida ne’e reprezenta tebes loron ohin nian tamba mundu tomak inklui Timor-Leste selebra Loron Feto Internasional, no oinsa feto apoiu malu atu hetan oportunidade di’ak iha ekonomia hodi apoiu nia nesidade moris iha areal rural.

“hau orgulu tanba ohin bele hola parte iha seminariu ida ne’e hamutuk feto potesial sira seluk nebe durante ne’e haree deit husi media, maibe ohin hamutuk ho sira hodi fahe aspirasaun no motivasaun liga ba feto nia moris, maske hau nia luta ba feto iha baze maibe ita hotu luta ba hakbiit feto ” Angelina informa ba Jornalista FMDC hafoin seminariu iha TAF.

Maske Angelina envolve iha atividade selebra loron feto nian maibe nia seidauk sente satisfeitu tanba feto maluk seluk iha area rural nafatin iha kotuk.

“hau rona liafuan ida iguldade jeneru ne’e ita luta ba maibe la to’o feto sira iha area rural, tanba dalaruma feto potensial sira balun ba ko’alia kona ba igualdade jeneru iha de’it fatin ne’ebé bele asesu, entaun halo feto sira iha area rural nebe la aseseu Estrada, nafatin la hetan informasaun sira, maske hakarak atu rona” ho lian kiik feto potensial ne’e hatutan.

Enkuantu iha seminariu ida ne’e Ajelina koalia kona-ba oportunidade no Dezafius kria atividade negosiu ne’ebe nia ho grupo feto iha Maubise harii  liuhusi Asosiasaun Feto Hanoin ba Oin, hodi suporta kria atividade halo produsaun husi produtu lokal hanesa Cha herbal, temperus no stroberry, Cha Herbal ne’e exporta ona ba Japaun hahu tinan 2015 to’o ohin loron.

Iha seminariu ne’e Angelina sai panelista hamutuk ho feto potensail sira seluk, hanesan Nurima R. Alkatiri hanesan membru Parlamenu Nasional, Dinorah Granadeiro Presidente INDDICA, Ana Paula Marçal Prez.JSMP, Angelina da Silva Dir, Veronica Tilman Ativista Feminista, no partispa husi Organizasaun sira nebe durante ne’e Luta ba Direitus Humanus iha TL.

Jornalista: Natalia Araujo