Viqueque(12/10/23)-Sefe Suku laos Liurai, no laos mós kaer karimbu hodi tur iha sede suku hodi hein tau karimbu no asina dokumentus, sefe suku nia papél forte liuhusi asaun konkretu hamutuk ho komunidade hodi halo mudansa ba ita nia nasaun liuhusi baze.
Lia hirak ne’e hatoo husi kandidatura lideransa Suku Bibileo, Postu Viqueque Vila, Munisipiu Viqueque Moises Acacio ho naran kodigu (Laba-Laba), Oan husi Acacio F. Martins (falecido) no Brigida da C. V. Pinto, bali no kuidadu husi Aman Augustu Soares. Aman Acacio F. Martins mate tanba oho husi tropas Indonesia iha area mota Diolor Viqueque iha tinan 1978.
Foto official husi Acacio
Iha 1983 akontesimentu Kraras Acacio nia Inan-Aman lori sira nia família hodi halai no hela iha Dili hodi dada iis moris, hafoin tinan 10 hela iha Dili ikus mai sira tenki husik no ba hela iha Aman nia knua Fatuberliu husi tinan 1994 to’o ohin loron.
Ho lian forte no barani Acacio informa nia sei fila ba nia knua Bibileo tanba tinan barak husik hela nia rai moris fatin.
“agora hau prepara an hodi kandidatu ba elisaun suku, no fila ba Knua Bibileo tanba iha tinan 1983hau nia aman Augustu Soares lori ami halai sai husi akontesimentu Kraras hodi mai dada iis moris iha Dili no rai Fatuberliu, nune’e hau deside fila ba knua Bibileo hodi halo mudansa tuir kbiit ne’ebé iha” Acacio haktuir ba Jornalista Radio Liberdade.
Oan dahuluk husi maun alin nain 10 ne’e informa desizaun ne’ebé nia foti hetan suporta maximu husi feen kaben Lucinda Ornai de Jesus no família hotu.
“hau nia desizaun ne’e familia hotu suporta no ida ne’e mai husi vontade rasik prontu atu dedika a’an ba servi suku moris fatin, no agora hau prepara programa ba tinan 7, hodi Servi maluk Mate Restu ka Ran Maluk Bibileo durante mandatu, se komunidae Bibileo fo fiar iha elisaun suku” nia informa.
Antes ne’e Moises nu’udar lider komunitáriu iha Suku Fatukahi, Postu Fatuberliu, Munisípiu Manufahi, husi tinan 2016-2023 esperiénsia tinan 7 ne’e Acacio sei lori ba realiza iha nia knua Bibileo.
Acacio la iha edukasaun ne’ebé as nia to’o deit primaria 50 ano ka SD Klas 5, maibé husi loron ba loron idade aumenta Aman husi Oan nain 5 ne’e iha hanoin maduru hodi aprende husi ema seluk iha servisu fatin, tanba iha tinan 2006-2008 Acacio servisu iha FONTIL hanesan kondutor no iha tinan 2009-2011 hetan konfiansa hodi sai Ofisial FONTIL iha Munisipiu Viqueque.
Iha tinan 2011 nia rohan Acacio deside para servisu hodi halo negosiu kiik hanesan faan hena obrala, hakian manu-fahi, no faan mina bensin hodi sustenta familia nia moris. Tama tinan 2016 Moises brani an hodi kandidatu ba lideransa Suku Fatukahi hodi kompete ho kandidatura nain 3 seluk ikus mai Acacio hetan konfiansa hodi lidera Suku Fatukahi to’o ohin loron, no fulan Outubru tinan ne’e hakara fila ba Knua Bibileo (Klalerek Mutin).
“Husi Responsabilidade Moral ho Koñesimentu kiik ne’ebé ha’u iha, hakarak fila ba servi maluk Mate Restu ka Ran Maluk Bibileo tuir Giaun Luta nia Hanorin mak Servir a Patria, no ha’u ba ho Tema Kandidatura elisaun suku mak 2024 Mudansa ba Bibileo” Acacio Informa.
Iha fatin seluk komunidade Idalina Maia nuúdar mos manorin iha esperansa ba Bibileo oan ne’ebé iha hanoin hodi servi suku ne’e, tenki haku’ak no hakbesik an ba povu, imparsialidade, no honestu, tanba komundade hotu iha suku Bibileo presiza duni lideransa suku ida ne’ebé mak servisu ho responsabilidade.
Komunidade Idalina Maia, nudar mos manorin iha Suku Bibileo
“Ba kandidatura ne’ebé agora dadaun atu kompete, iha suku Bibileo hotu-hotu di’ak, maibé fila fali ba povu mak fihir no hodi hili, tuir ha’u wainhira Acacio eleitu ka povu fó fiar, tenki koñese nia komunidade sira iha suku laran no balun ne’ebé hela dok husi suku nune’e bele responde ba Povu nia preokupasaun tanba ita maka hanesan povu nia lian, liman no ain” Idalina informa.
Enkuantu Acacio eplika nia Iha mós Vizaun no Misaun rasik, Visaun mak: hakat ba oin hatur Suku Bibileo ida ne’ebé moris ho valores kulturais, dame, matenek, saudavel, moris hanesan no sai sarani ne’ebé di’ak iha futuru. Misaun mak -Halo atendimentu ne’ebé di’ak ba povu, -Kria konsellu suku ne’ebé lais hodi haree kondisaun povu iha suku laran, -Kapasita no dezenvolve povu atu susesu hodi apoiu ba moris di’ak.
Husi esforsu hirak ne’ebé kandidatura ne’e prepara nia iha sentimentu no korajem ba kandidatura seluk.
“se de’it mak Avansa iha Eleisaun suku ami hotu mak manán tanba ami mesak Ai Ranik no Manu Knuk Ida Deit no hanoin atu halo mudansa, mak maluk Bibileo Oan husi Aldeia 8 ne’e labele hetan deskriminasaun husi formas Asistensia Dezemvolvimentu sa ida de’it mak mosu iha suku laran” nia hakotu.
Discussion about this post